रुसका राष्ट्रपति भ्लादिमिर पुटिनले स्थिरताका लागि भविष्यका ठूला योजना बनाएका थिए । 

तर कोरोनाभाइरसका कारण उत्पन्न संकटका साथै तेलको दाम अनि रुसको मुद्रामा आएको गिरावटपछि उनको चुनौती बढेर गएको छ । 

अप्रिल महिनामा उनले रुसको संविधानमा संशोधन गरेर ८० वर्षभन्दा बूढो भए पनि सत्तामा बसिरहने बाटो बनाउँदैछन् । 

अहिले रुसीहरू अनिश्चितता र चिन्तामा डुबेका छन् तर पुटिन मुश्किलको समयमा शान्ति र संयम दर्शाइरहेका छन् । उनले समयमा उचित कदम चालेका कारण कोरोनाभाइरसको संक्रमण नियन्त्रणमा रहेको बताएका छन् । 

रुसको सरकारी सञ्चारमाध्यमले कोरोना फैलिनबाट रोक्नका लागि युरोपले सही व्यवस्थापन गर्न नसकेको र युरोपेली संघ विफल भएको बताइरहेको छ । 

युरोपका नेताहरू कोरोना संकटको सामना गर्न आइसोलेसनमा ध्यान दिइरहेका छन् । तर यसैबेला पुटिन क्राइमिया जाँदैछन् । क्राइमियालाई युक्रेनबाट खोसेर रुसमा मिसाएको ६ वर्ष पुगेको उपलक्ष्यमा पुटिन त्यहाँ जान लागेका हुन् । 

सबै कुरा सामान्य छ भन्ने देखाउनका लागि उनले यसो गरेका हुन् । उनी सामाजिक दूरी अपनाउने छैनन् । बाहिर आएर उनी मानिसहरूसँग भेटघाट गर्नेछन् र हात मिलाउनेछन् । 

तर पुटिनको सम्पर्कमा आउने मानिसलाई पहिले नै कोरोनाभाइरसको परीक्षण गरिनेछ । 

अघिल्लो साता क्राइमिया मेडल लगाएर सम्मान गरिएका मानिस, क्रेमलिनका कर्मचारी र मान्यताप्राप्त पत्रकारलाई स्वास्थ्य परीक्षण गरिएको थियो । 

पुटिनको परीक्षण पनि गरिएको छैन । यस विषयमा उनका प्रवक्ता दिमित्री पेस्कोभले भने, ‘धन्य, उहाँमा कुनै लक्षण छैन । उहाँ सुरक्षित हुनुहुन्छ र पूर्व निर्धारित कार्यक्रमहरू गरिरहनुभएको छ ।’

तर रुसमा संक्रमणका दरहरू बढिरहेका छन् । सरकारी आँकडामा मानिसले विश्वास गरिरहेका छैनन् । 

राष्ट्रपति पुटिनले कोभिड–१९ बाहिरबाट आएको रोग र विदेशी खतरा भने पनि सुरक्षात्मक कदम बढाइरहेका छन् ।

त्यहाँ सीमादेखि लिएर विद्यालयसम्म बन्द गरिएको छ अनि मानिसहरूलाई भेला हुन समेत दिइएको छैन । 

संविधान संशोधनका लागि गरिने मतदानलाई सुरक्षा कारणले स्थगन गरिने वा अन्लाइन चुनाव गरिने सम्भावना पनि रहेको अधिकारीहरूले बताएका छन् । 

तर शुक्रवार रुसको निर्वाचन आयोगले नयाँ योजना सार्वजनिक गरेको छ । त्यसअन्तर्गत मतपत्रहरूलाई एक हप्ताको समयमा बिस्तारै मतदातासमक्ष पुर्‍याइनेछ जसले गर्दा भीड जम्मा नहोस् । 

राजनीतिक विश्लेषक कन्स्ट्यान्टिन कलाशेभले नेजाभिसिमिया गजेटा नामक पत्रिकालाई बताएअनुसार, निर्वाचन गराउने पूरा कोशिश गरिँदैछ । त्यो स्थगित नहोस् भनेर प्रयासहरू गरिएका छन् । अहिलेको संकट छिट्टै हट्ने र रुसलाई धेरै घाटा नलाग्ने आशा अधिकारीहरूले गरेका छन् । 

रुसमा केही मानिसहरू कोरोनाभाइरसका विषयमा निष्फिक्री छन् । 

रुसको रक्षा मन्त्रालयले भाइरस नियन्त्रणका लागि आकस्मिक अभ्यास आयोजन गरेको छ र देशका सबै प्रान्त्लाई उच्च सतर्कताको स्थितिमा राखेको छ । 

तर राष्ट्रपति पुटिनलाई सत्तामा राखिरहनका लागि गरिने मतदान अप्रिल २२ को निर्धारित तिथिमै हुनेछ ।