अमेरिकाका राष्ट्रपति डोनल्ड ट्रम्पले राष्ट्रव्यापी बन्दाबन्दी (लकडाउन) गर्दा देश बर्बाद हुने बताएका छन् । 

कोरोनाभाइरसका तीव्र गतिमा फैलिँदै जाँदा संसारभरि गम्भीर चिन्ता व्यक्त गरिएको छ । तर ट्रम्पले अप्रिल महिनाको आरम्भमा अमेरिकामा सुन्दर समय आउन लागेको बताए । 

विश्व स्वास्थ्य संगठनले कोरोनाको नयाँ केन्द्र अमेरिका बन्न लागेको भनेकै बेलामा ट्रम्पको यो बयान आएको हो । 

अमेरिकामा ५५ हजारजनामा कोरोनाभाइरसको संक्रमण देखिएको छ भने ७७५ जना मारिएका छन् । संसारभरि १८ हजार ९१२ जनाको मृत्यु भइसकेको छ । 

मंगलवार फक्स न्युजलाई दिएको अन्तर्वार्तामा ट्रम्पले ईस्टर पर्वअघि नै देशमा सामान्य स्थिति आउने बताए । ईस्टर अप्रिल १२ मा पर्छ । 

ट्रम्पलाई अमेरिकी अर्थतन्त्रको चिन्ता छ । त्यसैले ह्वाइट हाउसको ब्रीफिङमा पनि उनले त्यही कुरा दोहोर्‍याए । 

व्यापार र उद्योगका लागि देश खुलेन भने भयानक आर्थिक मन्दी आउने ट्रम्पको कथन छ । 

उनले भने, ‘हामीले धेरै मानिस गुमाउनेछौं । हजारौं मानिसले आत्महत्या गर्न सक्छन् । देशमा अस्थिरता आउन सक्छ ।’

ट्रम्पलाई आर्थिक मन्दीबाट हुने व्यापक हानिको बढी चिन्ता छ । 

ट्रम्पले लकडाउन खुकुलो बनाउने कुरा गरिरहँदा अनेकौं राज्य चाहिँ लकडाउन लगाउने कुरा गर्दैछन् । 

अमेरिकाका १७ राज्यमा लकडाउनको घोषणा भइसकेको छ । 

विगत केही दिनदेखि अमेरिकी अधिकारीहरू कोरोनाभाइरसको संक्रमण रोक्ने कुरा गरिरहेका छन् । अनि अमेरिकाको स्वास्थ्य प्रणालीमा दबाब परेको कुरा पनि आइरहेको छ । साथै अर्थतन्त्रमा आउने संकटको कुरा पनि जोडतोडले उठाइएको छ । 

अघिल्लो साता अमेरिकाका अर्थमन्त्री स्टिभ म्नुचिनले अमेरिकामा बेरोजगारी २० प्रतिशतसम्म जान सक्ने बताए । 

गोल्डम्यान स्याक्सको प्रतिवेदनअनुसार, अमेरिकाको कुल गार्हस्थ्य उत्पादन दोस्रो त्रैमासिकमा २४ प्रतिशतसम्म गिर्न सक्छ । 

तर ट्रम्प व्यापारलाई छिट्टै खोल्न चाहन्छन् । ट्रम्प समर्थकहरू ट्रम्पका राजनीतिक विरोधी कोरोनाभाइरसका कारण अर्थतन्त्रमा पुगेको हानिलाई उनीविरुद्ध उपयोग गर्न सक्छन् भनिरहेका छन् । 

आफ्नो शासनकालमा अमेरिकी अर्थतन्त्र मजबूत बनेको भन्दै ट्रम्पले घमण्ड गर्ने मौका पाएका छन् । तर कोरोनाले अर्थतन्त्र तहसनहस बनाएपछि ट्रम्पलाई फेरि चुनाव जित्नका लागि बलियो अर्थतन्त्र देखाउने अवसर नमिल्ने भएकाले उनी जतिसक्दो चाँडो लकडाउन खोलेर व्यापारलाई चलायमान बनाउन चाहन्छन् । 

तर उनको यो प्रयासलाई विभिन्न राज्यहरूले अवरोध गर्ने देखिएको छ ।