अफगानिस्तानको राजधानी काबुलमा रहेको शिख धर्मावलम्बीको एक गुरद्वारामा बुधवार आतंकवादीहरूले आक्रमण गर्दा २७ जना सर्वसाधारण मारिएका छन् भने आठजना घाइते भएका छन् । 

चारजना आतंकवादीलाई अफगान सुरक्षा बलले मारेको खबर छ । 

आतंकवादीहरूले गुरद्वारामा आक्रमण गर्दा २०० जना भित्र फसेका थिए । 

अफगान सुरक्षा बलहरूले गुरद्वारा भएको क्षेत्रलाई घेराबन्दी गरेर आतंकवादीहरूसँग भिडन्त गरेका थिए । 

गृह मन्त्रालयका प्रवक्ता तारिक एरियनले भने, ‘धेरैजसोलाई त उद्धार गरियो तर दुर्भाग्यवश केही मानिस हताहत भएका छन् ।’ 

शिखहरूमाथि यसअघि इस्लामिक लडाकूहरूले आक्रमण गर्ने गरेका थिए । तालिबानका एक प्रवक्ताले चाहिँ आक्रमणको जिम्मेवारी लिएनन् । 

आक्रमणमा इस्लामिक स्टेटको हात रहेको हुन सक्ने आशंका गरिएको छ । 

अफगानिस्तानमा ३०० परिवारभनदा पनि कम शिखहरू छन् । भारतले नयाँ कानून ल्याएर अफगानिस्तानमा रहेका शिख अल्पसंख्यकहरूलाई भारतको नागरिकता लिनका लागि सहज बनाएको छ ।