अत्यावश्यक कामबाहेक बाहिर ननिस्कन जारी गरेको सरकारी आदेशविरुद्ध तपाईं विना काम वा रमिता हेर्न भन्दै उपत्यकाका सडकमा निस्कने गर्नुभएको छ ? अब त्यसरी जानुभयो भने तपाईले सडकमै कारवाही भोग्नुपर्ने छ ।
कारवाही पनि विल्कुल फरक खालको । त्यसरी निस्किँदा प्रहरीले जहाँ भेट्छ त्यहीँ ठाउँमा बस्नुपर्नेछ । 

यसअघि सरकारी आदेश उल्लंघन गरेर निस्किँदा प्रहरीले पक्राउ गथ्र्याे । अब प्रहरीले जुन ठाउँमा भेटेको छ, त्यहीँ ठाउँमा केही घण्टाका लागि ‘होल्ड’ गर्ने (एकै ठाउँमा राख्ने) छ । त्यहाँबाट कहीँ जान पाइँदैन, केही घण्टापछि जुन ठाउँबाट आएको हो, त्यहीँ ठाउँमा फर्कनुपर्छ ।

अत्यावश्यक कामबाहेक बाहिर ननिस्कन जारी गरेको आदेश उल्लंघन गर्ने क्रम बढेपछि शुुक्रवारदेखि नेपाल प्रहरीले नियन्त्रण अभियानलाई तीब्रता दिएको थियो । यसरी नियन्त्रणमा लिँदा जोखिम बढ्ने देखेपछि प्रहरीले कारवाही अभियानलाई परिवर्तन गरेको हो । 

विभिन्न ठाउँबाट पक्राउ गर्दा सयौंको संख्यामा एकै ठाउँमा मानिसको भीड हुन्छ । भीड जम्मा गर्दा कसैमा रोगको संक्रमण भए फैलनसक्ने सम्भावना अधिक हुन्छ । प्रहरीमा रोग फैलियो भने समुदायमा जाने सम्भावना झन् बढी हुन्छ । त्यसैले शनिवार मात्रै उपत्यकामा महानगरीय प्रहरी कार्यालय रानीपोखरीले आदेश उल्लंघन गर्नेका लागि कारवाहीको नयाँ नियम लागू गरेको छ । 

कार्यालयका प्रमुख प्रहरी नायब महानिरीक्षक विश्वराज सुवेदीले भने, ‘पक्राउ गरेर लैजाँदा मानिस धेरै जम्मा हुने र राख्ने ठाउँको अभाव तथा भीड बढी हुँदा जोखिम बढ्ने देखियो, त्यसैले अब कारवाही स्वरुप जसलाई जहाँ भेटिन्छ, उसलाई त्यहीँ होल्ड गर्न थालेका छौं ।’

उनका अनुसार सडकपेटीमा जहाँ भेटिन्छन्, त्यहीँ ठाउँमा केही मिटरको दुरीमा मानिसलाई कम्तिमा २ घण्टा राखिने छ । त्यसो गर्दा उनीहरूलाई प्रहरीले छुन पनि पर्दैन । जसले सबैजना सुरक्षित हुन सकिन्छ । 

उपत्यकाको काठमाडौं, ललितपुर र भक्तपुर प्रहरी परिसरलाई उक्त विषयमा निर्देशन नै दिइसकेको पोखरेलले बताए । एकै ठाउँमा बस्दा उल्लंघनकर्तामा एउटा चेतावनी पनि हुने र जोखिम पनि कम हुने प्रहरीको विश्लेषण छ ।

अत्यावश्यक कामबाहेक बाहिर ननिस्कन सरकारले जारी गरेको आदेश उल्लंघन गर्ने विरुद्ध कडारूपमा प्रस्तुत भएको प्रहरीले अपराह्नसम्ममा ५ सय बढीलाई नियन्त्रणमा लिएको थियो । उनीहरूमध्ये धेरैलाई प्रहरीले आजै छाडिसकेको छ । यसरी फक्राउ गर्दा समस्या देखिएपछि प्रहरीले शनिवारदेखि उक्त काम थालेको हो । 

कोरोना भाइरसको संक्रमण रोकथामका लागि सरकारले जारी गरेको आदेशलाई बेवास्ता गर्ने क्रम भने अझै रोकिएको छैन । चेतना भएर पनि मानिसमा लापरवाही गर्ने क्रम देखिएको छ । अन्य बेलाको जस्तो बन्द नभएकाले स्वास्थ्यमा खेलवाड गर्न नहुने चिकित्सकहरुले बताउँदै आएका छन् ।

साँझ–बिहान अझै बढी मान्छे निस्किने गरेका छन् । दिनदिनै जोखिम रहेको र एउटाको लापरवाहीले आम समुदायलाई नै असर गर्ने भएकाले कुनै सम्झौता गर्न नसक्ने प्रहरीले जनाएको छ । घरमै बसेर घरमै रमाउनुभन्दा अन्य विकल्प नहुने मनोविद् पदमराज जोशी बताउँछन् ।

विश्वव्यापीरूपमा कोरोना भइरसको महामारी बढ्दै गएपछि सरकारले यही चैत ११ गतेदेखि लागू हुने गरी यही चैत १८ गते बिहान ६ः०० बजेसम्म अत्यावश्यकबाहेक बाहिर ननिस्कन आदेश जारी गरेको थियो । शनिवार पाँचौं दिन मुख्य सडक र बजारमा सरकारी आदेशको पूर्ण कार्यान्वयन भएको देखिएको छ तर भित्री बजार र सडकमा भने अझै मानिसको चहलपहल देखिन्छ । साँझको समयमा बढी निगरानी जरुरी रहेको स्थानीयले बताएका छन् । 

मुलुकमा कोभिड–१९ को संक्रमण फैलिन नदिन सरकारले उच्च सतर्कता अपनाउँदै आएको छ । मुलुक लकडाउन भएपछि  खाद्यान्नलगायत अत्यावश्यक सामग्रीको अभाव हुन नदिन सरकारले आवश्यक व्यवस्था समेत मिलाएको गृह मन्त्रालयले जनाएको छ । – नारायण ढुंगाना/रासस