गण्डकी प्रदेशमा पहिलो पटक भएको कोरोना भाइरस संक्रमणको परीक्षणको रिपोर्ट आएको छ ।

आइसोलेसनमा रहेकामध्ये ३ बिरामीको स्वाब परीक्षण गरिएकोमा सबैको नतिजा ‘नेगेटिभ’ आएको हो ।

प्रदेश राजधानी पोखरास्थित पोखरा स्वास्थ्य विज्ञान प्रतिष्ठानमा मंगलवार मात्र पीसीआर मेसिन जडान भई परीक्षण शुरू भएको हो ।

गण्डकी प्रदेश स्वास्थ्य निर्देशनालयका निर्देशक डा. विनोद विन्दु शर्माले पीसीआर मशिन सञ्चालनमा ल्याएपछि ३ जना बिरामीको मंगलवार स्वाब संकलन गरी ल्याब जाँच गरिएकोमा सबैको नतिजा नेगेटिभ आएको बताए । उनका अनुसार अब क्रमशः यहीँबाट कोरोना जाँच हुनेछ ।

गण्डकीबाट हालसम्म ४७ जनाको नमूना संकलन गरिएकोमा १ जनाको पोजिटिभ र २१ जनाको नेगेटिभ देखिएको छ । अन्य २५ जनाको नतिजा आउन बाँकी छ । पोजिटिभ नतिजा आएको बागलुङकी १ युवतीको हो । 

पोखराबाटै परीक्षण शुरू गरेपछि प्रदेशका विभिन्न ११ जिल्लाको लागि सहज हुने देखिएको छ । गण्डकी प्रदेशका विभिन्न जिल्लामा गरी १३३ वटा आईसीयू छन् भने भेन्टिलेटर संख्या ५४ रहेको छ ।

पोखरामा मंगलवार मात्र काठमाडौंबाट हेलिकप्टरमा पोर्टेबल पीसीआर मशिनसहित रिजेन्ट, १ हजार वटा पीपीई सेट, २ हजार ४०० मास्क, २ हजार पञ्जा, १० वटा आईआर थर्माेमिटर, १ सेट पोर्टेबल भेन्टिलेटर ल्याइएको हो । 

पोखरास्थित निजी क्षेत्रका अस्पतालले ज्वरोखोकी लागेका बिरामीलाई सम्भावित कोरोना भाइरसको संक्रमण भन्दै जाँच गर्न मानेका छैनन् ।

विगतका दिनमा रुघाखोकी, ज्वरो लगायतका सामान्य बिरामीका लागि ल्याबका लागि आवश्यक विभिन्न प्रकारका जाँच गर्ने निजी अस्पतालले अहिले बिरामीलाई अस्पतालको गेटबाटै फर्काउने गरेका हुन् । 
पोखरास्थित ठूलै निजी अस्पतालले त्यसो गरेको भन्दै बिरामीले गुनासो गरेका छन् ।