विश्वव्यापी महामारीको रुपमा फैलिएको कोरोना भाइरस (कोभिड- १९) का कारण शुक्रवारसम्म विश्वभर ५५ हजार १ सय ८९ जनाको मृत्यु भएको छ । १० लाख ४० हजार ६ सय ५६ जनामा संक्रमण देखिएको छ ।

विश्वभर कोरोनाको सन्त्रास फैलिएपनि नेपालमा अहिलेसम्म कसैको मृत्यु भएको  छैन । 

शुक्रवारसम्म नेपालमा १ हजार ३ सय ५६ जनाले स्वास्थ्य परीक्षण गराएका छन् । त्यसमध्ये ६ जनामा मात्र संक्रमण देखिएपछि १ हजार ३ सय ५० जनामा संक्रमण देखिएको छैन । 

कोरोनाको वारेमा जनचेतना जगाउँदै आएका डा रवीन्द्र पाण्डेले केही पूर्व शर्त पूरा गरेमा कोरोनाका कारण डराउनु नपर्ने बताएका छन । 

सामाजिक सञ्जाल फेसबुकमा शुक्रवार एक सन्देश लेख्दै कोरोनाबाट बच्नको लागि १८ वटा शर्त पूरा गर्नुपर्ने बताएका छन । 

हेर्नुहोस डा पाण्डेले राखेका १८ पूर्वशर्त :

तपाईं कोरोना संक्रमणबाट डराउनु पर्दैन यदि ;

- तपाईं घरभित्र नै बस्नुभएको छ भने ।

- तपाइंले पसल वा अनलाइनबाट ल्याएका सामान निस्संक्रमण गरेर तथा राम्रोसंग पकाएर खानुहुन्छ भने ।

- तपाइंले बासी खाना, बाहिरको खाना, अत्यधिक रक्सि तथा चुरोट सेवन गर्नुभएको छैन भने ।

- तपाईं बालबालिका तथा जवान व्यक्ति हुनुहुन्छ भने ।

- तपाइंलाईले औषधि सेवन गरेर रक्तचाप, मधुमेह, कोलेस्टेरोल, युरिक एसिड जस्ता दीर्घ समस्या नियन्त्रणमा राख्नुभएको छ भने ।

- तपाईं पर्याप्त सुत्ने, नियमित २० मिनेट ब्यायाम गर्ने, ताजा तरकारी / फलफुल लगायत पोषिलो खाने, धेरै चिन्ता नगर्ने, गहिरो स्वाश्प्रश्वास लिने, योग तथा मनोरंजन गर्ने लगायतको जीवनशैली अपनाउनुभएको छ भने ।

- तपाइंले आफ्नो खानामा कुरिलो, अदुवा, मह, कालो जामुन, जैतुनको तेल, तुलसी, बांबरी, लसुन, च्याउ, खरबुजा, गहुँका जमरा, दही, पालुंगो, ग्रिन टि, सख्खरखण्ड, ब्रोकाउली, हरियो लसुनको सुप, अनार, बन्दगोभी, खुर्सानी, नरिबल तथा नरिबलको तेल, ऐंसेलु, सुन्तला, कागती, अमला, स्याउ, हलेदो, बेसार, डार्क चकलेट, सूर्यमुखी फूलका बियाँ, बदाम, किवी, स्ट्रबेरी, अकबरी खुर्सानी, केराउ,अण्डा, मरिच, सुप आदिलाई आफ्नो खानामा प्राथमिकता दिनुभएको छ भने ।

- तपाइंले घरबाहिर सामाजिक दुरी कायम गर्नुभएको छ भने ।

- तपाइंले दैनिक नुहाउने, घाममा बस्ने, घाममा सुकाएर कपडा लगाउने, हात सधै सफा राख्ने, नाक/मुख/आँखामा हात नलग्ने लगायत सरसफाईको अभ्यास गर्नुभएको छ भने ।

- तपाइंलाई रुघाखोकी लाग्ने, घांटी खसखस गर्ने भएपनि उच्च ज्वरो आएको छैन, सुख्खा र लहरे खोकी लागेको छैन तथा सास फेर्दा घ्यारघ्यार भएको छैन भने ।

- तपाइं इल्डर होम, सरुवा रोग अस्पताल तथा धार्मिक समुहमा बस्नुभएको छैन भने ।

- तपाईं बाहिर निस्कँदा सुरक्षित मास्क, चस्मा, पंजा तथा फूल स्लिभ लगाउने तथा घरबाहिर ती कपडा नष्ट गर्ने / फेर्ने गर्नुभएको छ भने ।

- तपाइँ सार्वजनिक यातायात प्रयोग गर्नुहुँदैन भने ।

- तपाईं कोरोना संक्रमितको असुरक्षित ढंगले उपचार गर्ने स्वास्थ्यकर्मी हुन्हुन्न्न भने ।

- तपाइंले भिटामिन सि, बि ६, बि १२, इ, जिंक, फिस आयल, भिटामिन डी, लगायतका सप्लिमेन्ट नियमित सेवन गर्नुभएको छ भने ।

- तपाइंले सुपर हर्ब जस्तै : यार्शागुम्बा, तुलसी चिया ( तुलसी, गुर्जो, लेमन ग्रास मिसिएको ), ganoderma, Moringa, Zinkobiloba, Ginseng लगायत नियनित सेवन गर्नुभएको छ भने ।

- तपाइंले नचिनेको खाना, काँचो मासु खानु हुँदैन भने ।

- तपाइंले नेपाली परम्परागत मसला तथा खानाको सेवन गर्ने गर्नुभएको छ भने । आदि ।