कोभिड १९ भाइरसका बारेमा गरिएको एउटा रिसर्चले बिरालोबाट पनि यो भाइरस सर्न सक्ने अनौठो तथ्य पत्ता लगाएको छ ।

चीनको हर्बिन भेटेनरी अनुसन्धान संस्थाले बिरालोबाट पनि कोरोनाभाइरस सर्न सक्ने निष्कर्ष निकालेको हो ।

अनुसन्धानले एउटा बिरालोले अर्को बिरालोमा पनि कोरोना भाइरस सार्न सक्ने देखिएको डेली मेलको अनलाइन संस्करणले समाचार प्रकाशित गरेको छ ।

अनुसन्धानकर्ताहरूले केही बिरालामाथि यो परीक्षण गरेका थिए ।

केही दिनअघि बेल्जियममा एक महिलामार्फत एउटा बिरालोमा यो भाइरस संक्रमण भएको समाचार अन्तर्राष्ट्रिय सञ्चारमाध्यमहरूले प्रकाशित गरेका थिए ।

उक्त महिला बिरामी भएको १ हप्तापछि उनले पालेको बिरालोमा पनि कोरोना भाइरस देखिएको दाबी गरिएको थियो ।

बेल्जियमका एक कोरोनाविज्ञ स्टेभन गुचले कोरोना भाइरसको प्रकृतिबारे नयाँ नयाँ तथ्यहरू फेला परेको बताए ।

‘चीनको वुहानबाट फैलिएको भाइरसका बारेमा नयाँ तथ्यहरू हासिल भएका छन्,’ उनले भने ।

चीनमा गरिएको उक्त अनुसन्धानको समीक्षा हुन भने बाँकी छ । तर वैज्ञानिकहरूले जनावरमा पनि कोभिड १९ को संक्रमण हुन सक्ने तथ्य विश्वसनीय मान्ने गरेका छन् ।