कोरोना भाइरसको संक्रमण रोक्न मुलुकमा जारी तेस्रो चरणको लकडाउन (बन्दाबन्दी) अन्तिम चरणमा पुगेपनि लकडाउन छिट्टै खुल्ने सम्भावना देखिँदैन ।

यहीँ अवधिमा विभिन्न ठाउँमा ज्यालादारी गर्ने तथा जागिर गर्ने मजदुरहरू काम समेत रोकिएपछि घरसम्म पैदलै यात्रामा निस्किरहेका छन् ।

उनीहरूमध्ये कर्णाली र सुदूरपश्चिमका विभिन्न जिल्लाका १२० जना मजदुर ११ दिन लगाएर पैदलै बुटवलसम्म आएका छन् ।

काम गर्ने ठाउँमा काम रोकिएको, डेरामा खर्चपर्च सकिएको र काम कहिले खुल्ने भन्ने सम्भावना नरहेपछि सबै मजदुर सामूहिक निर्णय गर्दै घरतिर हिँडेका छन् ।

हिँड्ने क्रममा विभिन्न ठाउँमा कष्ट र पीडा भोग्दै आएका उनीहरूलाई बुटवलमा आएपछि भने ११ दिनदेखिका सबै पीडा भुल्ने मौका मिल्यो । बुटवल उपमहानगरपालिकाले उनीहरूलाई निःशुल्क खाना खुवायो, स्वास्थ्य चेकजाँच गरायो र बसको व्यवस्था गरेर घरतर्फ पठायो । यस्तो व्यवस्था भएपछि उनीहरूको अनुहारमा खुशीको चमक देखिएको थियो ।

सोलुखुम्बुदेखि दोलखा, स्याङ्जा हुँदै उनीहरू बुटवलसम्म आइपुगेको सूचना पाएपछि उपमहानगरपालिका प्रमुख शिवराज सुवेदीले तत्कालै उनीहरू पुगेको स्थानमा वडाध्यक्ष महेन्द्र लिगलाई संयोजन गरेर खाना बनाउन लगाएका थिए ।

बुटवल–१ स्थित लायन्स आँखा अस्पताल परिसरमा उनीहरूलाई खाना खुवाउने प्रवन्ध मिलाइएको थियो । त्यहीँ नै स्वास्थ्य चेकजाँच गरिएको थियो । त्यहीँबाट उनीहरूलाई ३ वटा बसमा चढाएर पठाइएको थियो ।

पैदल आएका मजदुरहरू दाङ, कैलाली, सुर्खेत, बर्दिया, कञ्चनपुर र डोटी घर भएका छन् । कोही सोलुबाट, कोही काठमाडौंबाट, कोही काभ्रे र कोही नारायणघाटबाट आएकाहरू बुटवलमा एकठाउँमा भेटिएका थिए । उनीहरू सबैलाई खाना खुवाएर स्वास्थ्य चेकजाँच गरेपछि घरसम्म पुर्‍याउन यातायातको समेत व्यवस्था मिलाइएको उपमहानगरपालिका प्रमुख सुवेदीले जानकारी दिए ।

प्रमुख सुवेदी र वडाध्यक्ष लिगलसहित नागरिक अगुवा र समाजसेवीले उपमहानगरको पुण्य काममा सहकार्य गरेका थिए । लामो समयदेखि पैदल हिँडेका कैयौं दिनसम्म खाना समेत खान नपाएका र बेखर्ची जस्तै बनेर हिँडेको देखेपछि खाना तथा यातायातको व्यवस्था मिलाइएको वडाध्यक्ष लिगलले बताए ।

स्थानीय युवा, समाजसेवी र केही नागरिक अगुवाले उक्त काममा सहकार्य गरेका थिए । बुटवलमा गरिएको परोपकारले घरैको जस्तो याद आएको र थकाइसमेत मेटिएको श्रमिक हरिबहादुर चन्दले दिए । बर्दिया घर भएका उनी साथीहरूसँगै सोलुखुम्बुबाट हिँडेर आएका थिए ।

काठमाडौंबाट हिँडेर आएका कञ्चनपुरका छोटेलाल चौधरी, कञ्चनपुरकै रामकिशन राना तथा बैतडीका अमबहादुर अवस्थीले पनि बुटवलमा भएको व्यवस्थाले पीडा भुलेको बताए ।
बेखर्ची बनेका र लखतरान भएका मजदुरलाई बुटवलमा खाना खुवाएर गन्तव्यसम्मै पुर्‍याएर पुण्य काम गरेको भन्दै नागरिक अगुवा एवं बटौली संरक्षण तथा सम्बद्र्धन समितिका संयोजक रवीन्द्रगोपाल लाकौलले प्रशंसा गरे ।

बुटवलमा राहत वितरण जारी

बुटवलले सबै वडामा पायक पर्ने गरी फिवर क्लिनिक, जनस्वास्थ्यको सेवाका लागि हटलाइन सेवा, अग्र्यानिक तरकारी उत्पादक स्थानीय किसानलाई प्रवद्र्धन गर्नेदेखि राहत वितरणका काम जारी राखेको उपमहानगरका प्रमुख प्रशासकीय अधिकृत चक्रपाणी शर्माले बताए ।

वडा र त्यहाँका टोल विकास संस्थामार्फत करीब ६ हजार ८३६ जना दैनिक ज्यालादारीमा काम गर्ने श्रमिकका परिवार रहेको लगत संकलन गरिएको र तिनैलाई राहत वितरण गरिरहेको अधिकृत शर्माले जानकारी दिए । बुटवलमा जनस्तरबाट राहत कोषमा रकम र खाद्यान्न सहयोग गर्ने कामसमेत जारी रहेको शर्माको भनाइ छ ।

बुटवलका अर्का मनकारी : जसले एकल खर्चले खाना खुवाए

लकडाउनमा कालोबजारी गर्ने र ठगी गर्ने मात्रै हुँदैनन्, कोही त मनकारी पनि हुन्छन् । यस्तै मनकारी मध्येका एक हुन् बुटवल उपमहानगरपालिका–३ सहस्रधाराका ५८ वर्षीय दुधबहादुर गुरुङ ।

उनले विभिन्न ठाउँबाट पैदलै हिँडेर बुटबलको बाटो हुँदै आउनेहरूलाई आफ््नै खर्चमा खाना खुवाएका छन् । मंगलवार बिहान बुटवलको पाखापानीस्थित मनकामना मन्दिर परिसर र प्रतिक्षालयमा राखेर खाना खुवाएका थिए । उनले मंगलबार बिहान मात्रै ७५ जनालाई खाना खुवाएका थिए ।

‘आजको दिन जति जना आउनुहुन्छ सबैलाई खुवाउने भनेको छु,’ उनले भने । बुटवलका यी मनकारी गुरुङ भारतीय सेनाबाट १० वर्षअघि सेवानिवृत्त भएका हुन् ।