कोरोनाविरुद्ध परिचालन गर्न स्वयंसेवी स्वास्थ्यकर्मीको विवरण तयार

सरकारले कोभिड–१९ को रोकथाम र नियन्त्रणमा स्वयंसेवक जनशक्ति परिचालन गर्न विवरण संकलन गरिरहेको छ ।

स्वास्थ्य तथा जनसंख्या मन्त्रालयले स्वयंसेवक परिचालन गर्न चिकित्सा शिक्षा आयोगका उपाध्यक्ष डा. श्रीकृष्ण गिरीको  संयोजकत्वमा मन्त्रालयका प्रमुख विशेषज्ञ डा. रोशन पोखरेल, मन्त्रालयका सहसचिव डा. गुणराज लोहनी र शिक्षा मन्त्रालयका दीपक शर्मा रहेको समितिसमेत गठन गरेको छ ।

समितिले विभिन्न मेडिकल कलेजमा अध्ययन गरेका स्वयंसेवा गर्ने इच्छुक चिकित्सक र नर्सको विवरण तयार पारेको छ । 

हालसम्म करीब स्वयंसेवी गर्ने इच्छुक २ हजार १२ स्वास्थ्यकर्मीको सूची समितिले तयार पारेको आयोगका उपाध्यक्ष डा. गिरीले जानकारी दिए । तीमध्ये ५२७ जना चिकित्सक र १ हजार ४८६ जना नर्स रहेका छन् । नोबेल मेडिकल कलेज विराटनगरबाट सय जना, चितवन मेडिकल कलेज, कलेज अफ मेडिकल साइन्स भरतपुर, गण्डकी मेडिकल कलेज, नेपाल मेडिकल कलेज सिनामंगल, किस्ट मेडिकल कलेज काठमाडौं, मनिपाल मेडिकल कलेज पाल्पा, नेपाल मेडिकल कलेज काठमाडौं, युनिभर्सल मेडिकल कलेज भैरहवा र नेपालगञ्ज मेडिकल कलेज नेपालगञ्जबाट ५०  जनाका दरले चिकित्सक स्वयंसेवी रुपमा परिचालन हुनेछ । 

यसैगरी नोबेल मेडिकल कलेज विराटनगर १५०, विराट मेडिकल कलेजबाट ११८, चितवन मेडिकल कलेज, कलेज अफ मेडिकल साइन्स भरतपुर, गण्डकी मेडिकल कलेजले पनि सय जनाका दरले नर्स खटाउने भएका छन् । ती स्वास्थ्यकर्मीलाई प्रभावित ठाउँमा खटाइने तयारी गरिएको आयोगका उपाध्यक्ष डा. गिरीले बताए ।

सरकारले विश्वव्यापी महामारी भएको कोभिड–१९ को रोकथाम गर्नका लागि जनशक्तिको सुनिश्चिताका लागि आवकाश प्राप्त र छात्रवृत्तिमा अध्ययन गरेका चिकित्सकलाई समेत परिचालन गर्ने निर्णय गरेको थियो । ती जनशक्तिलाई स्वयम्सेवी वा सेवा सुविधा दिएर कम्तीमा ३ महिनाका लागि खटाइने छ । 

मन्त्रालयले निजी स्वास्थ्य संस्थाका चिकित्सकलाई पनि सरकारी सेवामा आउन चाहेमा कार्यरत पदमै मिलान गरी काममा खटाइने छ ।