दक्षिण कोरियाले उत्तरसँगको सीमामा प्योङयाङविरोधी पर्चाहरू उडाउनबाट अभियन्ताहरूलाई रोक्नका लागि नयाँ कानून तर्जुमा गर्ने बिहीवार बताएको छ । सीमाक्षेत्रमा भइरहेका विरोध रोक्न सौल विफल भएमा सन् २०१८ मा गरिएको अन्तर्कोरियाली सैन्य सम्झौतालाई अन्त्य गर्ने धम्की उत्तरले दिएपछि दक्षिणले यस्तो कदम चालेको हो । 

दक्षिण कोरियाले सुस्त बन्दै गएको कूटनीतिलाई जीवितै राख्ने गरेको प्रयासले त्यहाँ अभिव्यक्ति स्वतन्त्रताको विषयमा बहस जन्माउने निश्चित देखिन्छ । 

दक्षिण कोरियाबाट सीमापारि बलूनमा प्योङयाङविरोधी कुरा राखेर फाल्ने कार्यक्रम अभियन्ताहरूले लामो समयदेखि गर्दै आएका छन् । तर उत्तर कोरियाले यसलाई आफ्नो सरकारमाथिको आक्रमणका रूपमा लिने गरेको छ ।्

उत्तर कोरियाबाट भागेर आएका मानिस तथा अन्य अभियन्ताले हालैका हप्ताहरूमा उत्तरका नेता किम जोङको आणविक महत्त्वाकांक्षा र मानवअधिकारको खराब रेकर्डका विषयमा आलोचना गर्दै लेखेका पर्चाहरू बलूनमा राखेर उडाएका थिए । 

किमकी बहिनी यो जोङले बलून उडाउनेहरूलाई आफ्नो देश छोडेर दक्षिणतिर भागेका तल्लो स्तरका मानिस र भुस्याहा कुकुर नाम दिएर आलोचना गरेको बयान त्यहाँको सरकारी सञ्चारमाध्यमले प्रसारण गरेको छ । ती भगुवाहरूलाई पाल्ने पनि जवाफदेही हुने भन्दै उनले सौलमा रहेको सरकारको पनि आलोचना गरिन् ।