कर्णाली प्रदेशमा कोरोनाभाइरस (कोभिड– १९) भन्दा आत्महत्या भयावह बन्दै गइरहेको छ । प्रदेश प्रहरी कार्यालय सुर्खेतको तथ्यांकअनुसार यस्तो देखिएको हो ।

कर्णालीमा जेठ ५ गते दैलेखको आठबीस नगरपालिका वडा नं. १ मा पहिलोपटक कोरोना संक्रमण देखिएको थियो ।

सरकारले कोरोनाको त्रासका कारण चैत ११ गतेदेखि देशभर लकडाउन जारी गर्‍यो । त्यो अवधिदेखि हालसम्म सुर्खेतका एकजना, डोल्पाका एकजना र दैलेखका एक जनाको मृत्युपछि कोरोना पुष्टि भयो ।

उनीहरू सबैको मृत्युमा अन्य रोग पनि कारण रहेपनि संक्रमण पुष्टि भएकाले कोरोनाबाट मृत्यु हुनेकै तथ्यांकमा जोडियो ।

यही अवधिमा प्रदेशभरिमा आत्महत्या गर्ने क्रम भने रोकिएन ।

प्रदेश प्रहरी कार्यालय सुर्खेतका सूचना अधिकारी प्रहरी उपरीक्षक राजीवबहादुर बस्नेतका अनुसार कर्णालीमा जेठ मसान्तसम्म ७९ जनाले आत्महत्या गरेका छन् । 

‘सुर्खेतमा १६ महिला, ८ बालक र ४ बालिका पाँच गरी ३३ जनाले आत्महत्या गरेका छन् । दैलेखमा ७ पुरुष, ६ महिला र १ बालक तथा एक बालिका गरी १५ जनाले आत्महत्या गरेका छन्,’ उनले भने, ‘रुकुममा २ पुरुष, ४ महिला र १ बालकसहित ७ जना, सल्यानमा १२ पुरुष, ७ महिला र १ बालक गरी २० जना, जुम्लाका २ पुरुष, १ बालक गरी ३ जना र डोल्पामा १ महिलाले आत्महत्या गरेका छन् ।’

जिल्ला प्रहरी कार्यालय सुर्खेतका प्रहरी नायब उपरीक्षक रामप्रसाद घर्ती मगरकाअनुसार चैत १२ गते देखि हालसम्म ३६ जनाले सुर्खेतमा आत्महत्या गरेका छन् ।

‘यो अवधिमा १४ जना पुरुष, ६ जना महिला र ९ जना बालबालिकाले झुण्डिएर आत्महत्या गरेका छन् । ६ जना पुरुष र १ महिलाले विष सेवन गरी आत्महत्या गरेका छन्,’ उनले भने, ‘कोही गरीबीका कारण, कोही मानसिक तनावका कारण तथा कोही चेतनाको अभावका कारण आत्महत्या गर्ने अवस्थामा पुगेको देखिन्छ,’ उनले भने ।

सबैभन्दा पहिले हरेक व्यक्ति आफैं मर्नु हुँदैन भन्नेबारे सचेत हुनुपर्ने उनी बताउँछन् । ‘मानिस सबैभन्दा सचेत प्राणी हो । आफूले आफैंलाई मार्नु हुँदैन भन्ने थाहा पाउनु पर्ने हो,’ उनी भन्छन्, ‘जनचेतनामूलक कार्यक्रम गर्न जरुरी छ । मैले के गर्न हुने के नहुने भन्नेमा हरेक व्यक्तिले ख्याल राख्नुपर्ने मैले देखेको छु ।’

१४ बालबालिकाले गरे आत्महत्या

लकडाउनको अवधिमा १४ जना बालबालिकाले आत्महत्या गरेका छन् । बालबालिकाले आत्महत्या गर्नुको स्पष्ट कारण खुल्न नसकेको प्रहरी स्रोत बताउँछ ।

‘कोही प्रेममा असफल भएको, कसैलाई बुवाआमा रिसाएको कारण आत्महत्या गर्ने गरेको विगतमा देखिएको छ । अहिले यी घटनामा के कारणले आत्महत्या गरेका हुन् भन्ने कुरा विस्तारै खुल्दै जाला,’ एक प्रहरी अधिकारीले भने, ‘अभिभावकले उचित शिक्षा नदिएका कारण बालबालिकाले आत्महत्या गरिरहेका छन् ।’