जनप्रतिनिधिका छोराहरूको गुण्डागर्दी : कुटपिटपछि जाहेरी फिर्ता लिन दबाब

लखन चाैधरी
लखन चाैधरी

लखन चौधरी लोकान्तरका लागि सुदूरपश्चिम प्रदेश प्रतिनिधि हुन् । 

कैलालीको गौरीगंगा नगरपालिकाका जनप्रतिनिधिका छोराहरूले नेतृत्व गरेको अराजक युवाको समूहले मरणासन्न कुटपिट गरेका १ युवक गम्भीर घाइते भएका छन् ।

नगरपालिकाका वडा सदस्यद्वय चिरञ्जीवी जोशी र अमृता विकका छोरासहित युवाहरूको कुटपिटबाट युवक घाइते भएका हुन् ।


Advertisement

ईलाका प्रहरी कार्यालय मसुरियाका प्रहरी नायव निरीक्षक डम्मरबहादुर थापाले आइतवार राति ती युवाहरूको कुटपिटले गौरीगंगा नगरपालिका–८ का राजकुमार कठरियाका २१ वर्षीय छोरा कमान्डो कठरिया घाइते भएका बताए ।

कुटपिटमा वडा सदस्य जोशीका छोरा निरज जोशी र वडा सदस्य विकका छोरा अर्जुन विकसहित गौरीगंगा नगरपालिका–४ का दिपेन्द्र सुनार, विवेक बराल, वडा नम्बर ९ का सुरेश चुनाराको संलग्नता रहेको प्रहरी नायव निरीक्षक थापाले बताए ।


Advertisement

घाइते कठरियाका बुवा राजकुमार कठरियाले आइतवार राति आफ्नो छोरालाई हेलमेट र बोतलले प्रहार गरी घाइते बनाएको बताउँदै आफ्नो परिवार नै असुरक्षित भएको दुखेसो सुनाए ।

ती युवाहरूबीच यसअघि पनि पटक–पटक झैझगडा हुने गरेको र प्रहरीसम्म नै उनीहरूको विवाद आउने गरेको प्रहरी नायव निरीक्षक थापाले बताए । घटनाअघि पनि ती युवाहरू प्रहरी कहाँ आएको बताइएको छ ।

यसैबीच, कुटपिटको घटनालाई आपसमै मिलाउने प्रयास भइरहको छ । वडा सदस्यद्वय सहितका व्यक्तिले आपसी छलफलबाटै घटनालाई मिलाउनुपर्ने दबाब सिर्जना गरिरहेका बताइएको छ । राति नै पक्राउ परेका निरज जोशीलाई उनका बुवा चिरञ्जीवी जोशीले पहुँचको भरमा घर लगेका जनाइएको छ ।

कुटपिट जस्तो आपराधिक घटनाका संलग्नलाई कानूनी कारवाही गर्नुपर्ने आफूहरूको माग रहेको पीडित कठरियाका बुवाको भनाई छ । प्रहरी नायव निरीक्षक थापाले पनि आफू सबै कानूनी प्रक्रियाको लागि तयारी रहे पनि आपसमै मिलाउनुपर्ने भन्दै छलफल भइरहेको स्वीकार गरे ।

लखन चाैधरी
लखन चाैधरी

लेखकबाट थप...

कमेन्ट गर्नुहोस्