अमेरिकाका परराष्ट्रमन्त्री माइक पम्पेओले केही चिनियाँ अधिकारीहरूलाई प्रवेशाज्ञा रोक्ने बताएपछि चीनले जवाफका रूपमा अमेरिकीहरूलाई चीनको प्रवेशाज्ञा नदिने बताएको छ । 

बेइजिङले अमेरिकी कूटनीतिकर्मी, पत्रकार र पर्यटकलाई तिब्बत जान नदिएकाले उसका अधिकारीलाई प्रवेशाज्ञा नदिने पम्पेओको भनाइ थियो । 
 

वाशिङटनले यसरी चिनियाँ अधिकारीमाथि लगाम लगाउन खोजेपछि चीनले जवाफी रूपमा प्रवेशाज्ञामा कडाइ गर्ने चीनको परराष्ट्र मन्त्रालयका प्रवक्ता झाओ लिजियानले बताए । 

दुई देशबीच तनाव बढिरहेको बेलामा विवादका विभिन्न विषय उठाउँदै एक अर्काका अधिकारीहरूको प्रवेशाज्ञा रोकिरहेका छन् । चीनले हङकङ, तिब्बत र सिनजियाङमा मानवअधिकार उल्लंघन र दमन गरिरहेको अमेरिकाको आरोप छ । बेइजिङले यी आरोपलाई अस्वीकार गर्दै वाशिङटनले चीनको आन्तरिक मामिलामा हस्तक्षेप गर्न नहुने बताएको छ । 

सन् २०१८ मा अमेरिकाले रेसिप्रोकल एक्सेस टु टिबेट याक्ट पारित गरेको थियो । यस ऐनले अमेरिकी कूटनीतिकर्मी तथा अन्य अधिकारी, पत्रकार र अन्य नागरिकका लागि तिब्बतमा पहुँच प्रवर्द्धन गर्न रोकमा संलग्न चिनियाँ अधिकारीहरूलाई अमेरिका पहुँचमा रोक लगाउने प्रावधान राखेको छ । 
 

कूटनीतिकर्मी र पत्रकारले विशेष पहुँच आवश्यक हुने चीनको एक मात्र क्षेत्र तिब्बत हो ।