त्रिन्ह नामक महिलाले लमीमार्फत आफ्नो हत्यारा भेटिन् । 

उनी २९ वर्षकी थिइन् र उनका पति ५० भन्दा माथिका थिए । उनलाई भियतनामी भाषा मात्र बोल्न आउँथ्यो, पति कोरियाली भाषा बोल्थे । 

संवादमा समस्या भए पनि उनीहरूबीच विवाह भएको थियो । सन् २०१८ को नोभेम्बर ४ मा भेटको भोलिपल्टै उनीहरूले भियतनाममा विवाह गरे । 

त्यसको सात महिनापछि त्रिन्ह (नाम परिवर्तन) पति शिनसँग दक्षिण कोरिया पुगिन् । त्यसको तीन महिनापछि उनको मृत्यु भयो । 
 

त्रिन्ह दक्षिण कोरियाली पुरुषहरूसँग विवाह गर्ने हजारौं भियतनामी महिलामध्ये एक हुन् । लमीले मिलाइदिएर उनीहरूको विवाह भएको हो । यस्तो लमी कामलाई दक्षिण कोरियामा प्रोत्साहन गरिने मात्र नभई स्थानीय अधिकारीले यसलाई सब्सिडाइज समेत गर्ने गरेका छन् । 

यसरी विवाह गरेका केही जोडीको विवाह सफल हुन्छ । तर यसरी दक्षिण कोरियाली पुरुषलाई भेट्ने विदेशी दुलहीहरू विभेद, घरेलु हिंसा र हत्याको शिकार पनि भइरहेका छन् । 

आँकडाहरू दुःखदायी तस्वीर देखाउँछन् । ४२ प्रतिशतभन्दा बढी विदेशी पत्नीहरूले शारीरिक, शाब्दिक, यौन तथा आर्थिक दुर्व्यवहार लगायतका घरेलु हिंसा बेहोर्नुपरेको राष्ट्रिय मानवअधिकार आयोगले सन् २०१७ मा बुझाएको प्रतिवेदनले देखाउँछ । तुलनात्मक रूपमा हेर्दा लैंगिक समानता तथा परिवार मन्त्रालयले सर्वेक्षण गरेकोमा २९ प्रतिशत दक्षिण कोरियाली महिला घरेलु हिंसाको शिकार बनेको देखिन्छ । 
 

विज्ञहरूका अनुसार, विभेदकारी नियम अनि समाजमा रहेको लैंगिक तथा जातीय विभेद यसमा दोषी छन् । उनीहरू विदेशी बेहुलीलाई सुरक्षित राख्नका लागि संस्थागत परिवर्तनमा जोड दिइरहेका छन् । 

विदेशी दुलहीहरूले भाषाको भिन्नताका कारण पनि विभेद सहनुपरेको देखिएको छ । 

दक्षिण कोरियामा महिला हुनु सहज छैन । 

वर्ल्ड इकोनोमिक फोरमको पछिल्लो ग्लोबल जेन्डर ग्याप रिपोर्टमा दक्षिण कोरिया ओईसीडी मुलुकहरूमध्ये सबभन्दा तल्लो दर्जामा छ । महिलाका लागि समान राजनीतिक तथा रोजगारी अवसरको अभाव पनि त्यसको एक कारण हो । 

विगत केही वर्षयता मनोरञ्जन जगतका हस्ती, राजनीतिकर्मी र विभिन्न खेलका प्रशिक्षकहरूमाथि यौन दुर्व्यवहार गरेको आरोप छ । गहिरो गरी जमेको पितृसत्तात्मक संस्कृतिविरुद्ध आवाज उठाउन यसले प्रेरित गरेको देखिएको छ । 

कोरिया विमेन माइग्रेन्ट्स ह्युमन राइट्स सेन्टरकी प्रमुख ह्यो योङ–सूकका अनुसार, विदेशी महिलाले अनेकौ स्तरमा विभेद सहनुपर्ने हुन्छ । लैंगिक विभेदका साथै जाती विभेद पनि सहने उनीहरूलाई संस्थागत विषयहरूले पनि समस्या निम्त्याउने गरेको छ । 

दक्षिण कोरियालीहरू पश्चिमी मुलुकबाट आफूमाथि जातीय विभेद हुने गरेको बताउँछन् तर आफूभन्दा आर्थिक रूपमा कमजोर देशबाट आएका मानिसलाई चाहिँ उनीहरू आफैं विभेद गरिरहेका हुन्छन् । 
 

सीएनएनबाट