काठमाडौं, २६ वैशाख— काठमाडौंको उत्तर पश्चिममा रहेको तारकेश्वर नगरपालिका, गोलढुंगाका स्थानीय नारायण महर्जन दिनभरि घरमै बसिरहेका हुन्छन् ।

उता मुख्य सडकमा प्रायः सबैजसो पार्टीका नेता भोट माग्दै नाच्दै रमाइलो गर्दै आउँछन् । कुनै समूह पार्टीका गीतमा नाच्दै गाउँदै आउँछन् । कुनै समूह बाइकमा हुरुरु आउँछन् । हल्ला गर्छन् र जान्छन् ।



चुनावले तारकेश्वर नगरपालिकाका धेरैजसो टोल तातेका छन् । चोकचोकमा मात्र होइन, प्रायःजसो घर, बाटोमा देखिने सबै खम्बामा समेत विभिन्न पार्टीका झण्डाहरू देखिएका छन् । जताततै चुनाव लागेको छ । विभिन्न पार्टीका नेताहरू टोलटोलमा भोट माग्न आएका छन् । स्थानीयसँग सेल्फीसमेत खिचाइरहेका छन् ।

सिन्धुपाल्चोक खाडीचौरका गोविन्द पराजुली चोकमा होटल गरेर बसेका छन् । उनको होटलमा जम्मा हुने धेरैले चुनावकै बारेमा कुरा गरेको उनी सुनाउँछन् ।

‘यहाँको चहलपहल बाक्लै छ । खासगरी एमालेको बढी चर्चा भएको छ यो टोलमा,’ चिया बनाउँदै गरेका पराजुली सुनाउँछन्, ‘केही दिनमा म पनि भोट हाल्न गाउँतिर जाँदैछु । यताको माहोलले गाउँ गएर भोट हालौं हालौं बनाएको छ ।’

तर उनको गाउँमा एकाधले बाहेक अरूले भूकम्पले भत्काएको घर ठड्याउन सकेका छैनन् । कुन पार्टीलाई भोट हाल्ने भन्ने अन्योलमा छन् उनी ।

शुद्ध खानेपानीदेखि स्मार्ट सिटीसम्म



वडावडाबाट उठेका अध्यक्ष तथा नगरपालिकाका मेयरले आफ्ना प्रतिबद्धतापत्रमा शुद्ध खानेपानीदेखि ‘स्मार्ट सिटी’ सपना बाँडेका छन् । एमालेले तारकेश्वर नगरपालिकालाई सार्वजनिक यातायात, खोलानालाको संरक्षण, शान्ति सुरक्षाका लागि टोलटोलमा सुरक्षा साइरन लगायतका घोषणा गरेको छ ।

अन्य पार्टीका प्रतिबद्धता पत्र आकर्षक लाग्छन् । नेपाली कांग्रेसबाट मेयर पदमा उठेका श्रीराम थापाले आफ्नो प्रदिबद्धता पत्रमा तारकेश्वर नगरपालिकालाई स्मार्ट सिटी बनाउने घोषणा गरेका छन् ।

उनले पर्यटकीय नगरी बनाउने मात्र होइन, खानेपानी ढल निकासी जस्ता समस्यालाई पनि आफ्नो प्रतिबद्धतामा स्थान दिएका छन् ।

टोलटोलमा झण्डा, सवारीमा पनि लाग्यो चुनाव



काठमाडौंका प्रायः सबैजसो गाउँमा चुनावी माहोल तातेको छ । निजी तथा सार्वजनिक साधनमा समेत कुनै न कुनै झण्डाका पार्टीहरू फरफराइरहेका देखिन्छन् । चुनावले केटाकेटीदेखि वृद्धवृद्धामा समेत रौनक छाएको छ । मोटरसाइकल तथा साइकलमा सवार गर्ने धेरैले पार्टीको झण्डाको प्रचार गरेका छन् ।



टोलटोलमा देखिने चुनावी माहोलले तारकेश्वर नगरपालिका तातेको छ । स्थानीयहरूले नेताहरूको सम्मान पाएका छन् । पालैपालो भोट माग्दै आउने राजनीतिक पार्टीमा नेपाली कांग्रेस, नेकपा एमाले, माओवादी र नयाँ शक्तिको बढी चहलपहल भएको स्थानीय बताउँछन् ।

---

---