पोखरामा नेपाल कम्युनिस्ट पार्टी (नेकपा) को माधव नेपाल पक्षको भेला आइतवार भएको छ ।

पूर्व प्रधानमन्त्री नेपालनिकट स्थायी कमिटी सदस्य सुरेन्द्र पाण्डेको उपस्थितिमा पोखराको लेकसाइडस्थित एक होटलमा गुटगत भेला भएको हो । 

माउन्ट कैलाश रिसोर्टमा आइतबार बिहान ११ देखि शुरू भेला साँझ अबेरसम्म जारी छ । बिहान ८ बजे नेकपाका स्थायी कमिटी सदस्य पाण्डे पोखरा आएका थिए । 

भेलामा नेपाल निकटका करीब ३५ जना प्रदेश तथा जिल्लास्तरका कार्यकर्ताहरू उपस्थित रहेको स्रोतले जनाएको छ ।

भेलामा नेकपाका विपक्षी गुटअन्तर्गतका कार्यकर्ताहरूलाई उपस्थित दिइएको छैन । आफ्नो निकटका कार्यकर्ताहरूलाई प्रवेशका लागि नाम पठाएपछि भेलास्थलबाट मानिस आएर मात्र लैजाने गरेका छन् । 

स्थानीय भेलाको समन्वय नेकपा केन्द्रीय सदस्य तथा पूर्व समानुपातिक सांसद चुडामणि जंगलीले गरेका हुन् । 

भेलामा युवा संघका केन्द्रीय नेता पूर्ण लामा, नेकपा कास्कीका नेता ओम नेपाली, अनेरास्ववियूका पूर्व उपाध्यक्ष सोभियत ढकाल लगायतको उपस्थिति छ ।

कास्कीमा वरिष्ठ नेता नेपाल पक्ष धरका भनी तुलबहादुर गुरुङ, श्रीनाथ बराल समेत चिनिन्छन् । तर सो गुटगत भेलामा अन्य को–को सहभागी छन् भन्नेबारे यकिन छैन । 

चितवनमा शनिवार मन्तव्य राख्ने क्रममा मदन भण्डारी फाउन्डेसनको विषयमा बोल्दै गर्दा पाण्डेविरुद्ध नेकपाकै कार्यकर्ताले नाराबाजी गर्दै कार्यक्रमस्थलबाटै लखेटेका थिए । 

सो घटना पोखरामा समेत दोहोरिन सक्नेतर्फ सचेत रहँदै बिहानैदेखि भेलास्थल आसपासको क्षेत्रमा सुरक्षा व्यवस्था कडा पारिएको हो ।