सुदूरपश्चिम प्रदेशमा कोरोना संक्रमणको शंकामा परेकाहरूको स्वाब संकलनमा सुस्तता देखिएको छ । पछिल्लो एक सातामा प्रदेशका विभिन्न जिल्लामा कोरोनाका शंकास्पद दुई हजार तीन सय ५१ जनाको मात्रै स्वाब संकलन गरिएको छ । नयाँ संकलन गरिएको र गत साताको गरी दुई हजार तीनसय ८८ जनाको स्वाब परीक्षण हुँदा प्रदेशभरी थप ३९२ जनामा कोरोना संक्रमण पुष्टि भएको छ। 

सामाजिक  विकास मन्त्रालयको तथ्यांक विश्लेषण गर्दा यो अवधिमा थप ३९२ जनामा सङ्क्रमण देखिँदा ४१३ जना उपचार व्यवस्थापनपछि घर फर्किएका छन् । अहिलेसम्म  नौ हजार ४६० घरफर्किएका  छन्  । सङ्कलन भएका केही नमुनाको परीक्षण हुन बाँकी छ । 

सेती प्रादेशिक अस्पताल धनगढी, कोभिड–१९ उपचार विभागका प्रमुख डा. शेरबहादुर कमरले कोरोना भाइरसको सङ्क्रमण हुने दरमा कमी नआएको बताए ।

‘जाडो मौसममा ‘भाइरल इम्फेक्सन’को जोखिम बढी हुने गर्दा कोरोनाको जस्तो लक्षण देखिने निमोनिया, रुघाखोकीका बिरामी बढ्दै गएको देखिएको छ’, उनले भने, ‘पछिल्ला दिनमा कोरोना भाइरसका जटिल अवस्थाका र सक्रिय सङ्क्रमित बिरामी भर्ना हुने दर पनि बढ्दो छ ।’

स्वास्थ्य निर्देशनालय दिपायलका कोभिड–१९ सम्पर्क व्यक्ति हेमराज जोशीले आवश्यक स्वास्थ्यकर्मीको अभाव हुँदा नमुना संकलन गर्ने काममा कमी आएको जानकारी दिए । 

लक्षण देखिएका र यस्ता व्यक्तिको सम्पर्कमा आएका, अन्यत्र ठाउँबाट आएर क्वारेन्टिनमा बसेकाहरुको मात्र नमुना संकलन गर्नुपर्ने पछिल्लो मापदण्ड बनेकाले पनि नमुना संकलनमा कमी आएको हुनसक्ने उनको भनाइ छ । 

संक्रमित भई होम आइसोलेसनमै मृत्यु हुने कतिपयको तथ्यांक भने मन्त्रालयसँग छैन । आजसम्म कैलालीमा १९, कञ्चनपुरमा पाँच, डडेल्धुरा र बझाङमा तीन÷तीन, अछाम, बाजुरा, दार्चुलामा दुई÷दुई  र डोटी तथा बैतडीमा एक÷एक गरी जम्मा ३८ जनाको मृत्यु भएको छ । 

सेती प्रादेशिक अस्पतालमा कोरोना सङ्क्रमणको जटिल अवस्थाका सात जनाको सघन उपचार कक्षमा र दुई जनाको भेन्टिलेटरमा उपचार व्यवस्थापन भइरहेको छ । तोकिएको स्वास्थ्य सुरक्षाका मापदण्ड नअपनाई सर्वसाधारणको चहलपहल बढ्दा कोरोना फैलिने जोखिम थप बढेको स्वास्थ्यकर्मीको भनाइ छ ।