चालू आर्थिक वर्ष २०७७/७८ को माघ मसान्तसम्ममा निक्षेप तथा कर्जा सुरक्षण कोषले वित्तीय क्षेत्रमा व्यापक सुधार गरेको देखिएको छ । 

कोषको चालू आर्थिक वर्षको माघ मसान्तसम्मको वित्तीय अवस्थाले विगतको तुलनामा आर्थिक क्षेत्रमा व्यापक सुधार भएको देखिएको हो । 

चालू आर्थिक वर्ष २०७७/७८ को माघ मसान्तसम्ममा कोषको खुद सम्पत्ति १५ अर्ब १५ करोड ८८ लाख ४५ हजार रुपैयाँ बराबर पुगेको छ । 

चालू आवको अन्तिमसम्ममा १५ अर्ब ४६ करोड २० लाख २२ हजार रुपैयाँ बराबरको खुद सम्पत्ति आर्जन गर्ने लक्ष्य कोषले लिएको छ ।

गत आव २०७६/७७ को असार अन्तिमसम्ममा कोषको यस्तो सम्पत्ति १४ अर्ब १३  करोड ४२ लाख ७३ हजार रुपैयाँ बराबरको रहेको थियो । 

कोषका प्रमुख कार्यकारी अधिकृत (सीईओ) विष्णुबाबु मिश्रले आर्थिक वर्ष २०७३/०७४ को असारमा कार्यभार सम्हालेका थिए । 

कोषको नेतृत्व मिश्रले सम्हाल्नुअघि अर्थात् आर्थिक वर्ष २०७३/७४ को असार मसान्तसम्ममा कोषको खुद सम्पत्ति ६ अर्ब ३ करोड ६८ लाख ६७ हजार रुपैयाँ रहेको थियो ।

कोषले चालू आर्थिक वर्ष (२०७७/७८)को सात महिनामा लक्ष्यभन्दा बढी चुक्तापूँजी संकलन गरेको छ । माघ मसान्तसम्ममा कोषको चुक्ता पूँजी १० अर्ब रुपैयाँ पुगेको छ । 

कोषले चालू आवको अन्तिमसम्ममा १० अर्ब चुक्ता पूँजी संकलन गर्ने लक्ष्य राखेको थियो ।

तर चालू आवको सात महिनामै चुक्ता पूँजी १० अर्ब पुगेको कोषले जनाएको छ । 

आर्थिक वर्ष २०७३/७४ को असार मसान्तसम्ममा कोषको चुक्ता पूँजी ३ अर्ब रुपैयाँ रहेको थियो ।

पछि आर्थिक वर्ष २०७६/७७ को असार मसान्तसम्ममा १० अर्ब रुपैयाँ चुक्ता पूँजी पुगेको थियो । 

चालू आवको माघ मसान्तसम्ममा कोषले ७ खर्ब ८६ अर्ब १४ करोड ७३ लाख ८५ हजार रुपैयाँ निक्षेप बीमा (सुरक्षण) गरेको छ । 

चालू आवको अन्तिमसम्ममा ७ खर्ब ९६ अर्ब ३६ करोड ७३ लाख १ हजार ५ रुपैयाँ निक्षेप बीमा गर्ने कोषले लक्ष्य लिएको थियो । 

कोषको माघ मसान्तको प्रतिवेदनअनुसार, लक्ष्य अनुसारको निक्षेप बीमा गर्न अब  १० अर्ब २१ करोड ९९ लाख १६ हजार रुपैयाँ मात्रै बाँकी रहेको छ । 

कोषले आव २०७३/७४ मा ३ खर्ब ८१ अर्ब ८९ करोड १ लाख रुपैयाँ निक्षेप सुरक्षण गरेको थियो ।

यस्तै आव २०७६/७७ मा कोषले यस्तो रकम बढाउँदै ६ खर्ब ८९ अर्ब ४८ करोड ९६ लाख रुपैयाँ सुरक्षण गरेको थियो । 

चालू आव २०७७/७८ को माघ महिनासम्ममा कोषको सञ्चालन आम्दानी १ अर्ब ४७ करोड ८४ लाख ५७ हजार रुपैयाँ रहेको छ । 

चालू आवको असार अन्तिमसम्ममा कुल २ अर्ब ९७ करोड १७ लाख रुपैयाँ आम्दानी बनाउने लक्ष्य लिएको कोषको यो आम्दानी लक्ष्यभन्दा १ अर्ब ४९ करोड ३२ लाख ४३ हजार रुपैयाँ कम हो ।

गत आर्थिक वर्ष २०७६/७७ को असार अन्तिमसम्ममा कोषको सञ्चालन आम्दानी २ अर्ब ७३ करोड ३५ लाख ४५ हजार रुपैयाँ रहेको थियो ।

कोषले चालू आर्थिक वर्षको माघ मसान्तसम्ममा १ खर्ब २३ अर्ब ६७ करोड ४७ लाख ३२ हजार रुपैयाँ कर्जा सुरक्षण (बीमा) गरेको छ । 

चालू आवको अन्त्यसम्ममा १ खर्ब २४ अर्ब ९१ करोड १४ लाख ७९ हजार रुपैयाँ कर्जा सुरक्षण गर्ने लक्ष्य लिएको छ । 

गत आव २०७६/७७ को असार मसान्तसम्ममा कोषले ६५ अर्ब २० करोड ९८ लाख ७८ हजार रुपैयाँ कर्जा सुरक्षण गरेको थियो । 

यस्तै आर्थिक वर्ष २०७३/०७४ को असार मसान्तसम्मा कोषले ६ अर्ब ८७ करोड ९० लाख ७३ हजार रुपैयाँ कर्जा सुरक्षण गरेको थियो । 

सबै आर्थिक सूचकहरूमा वृद्धि गर्दै लगेको कोषले चालू आवको माघ मसान्तसम्ममा २ अर्ब ५५ करोड ३९ लाख १९ हजार रुपैयाँ साना तथा मझौला उद्यमको कर्जा सुरक्षण गरेको छ । 

सोही अवधिमा  कोषले २ अर्ब ४३ करोड ४७ लाख १४ हजार रुपैयाँ कृषि कर्जा सुरक्षण गरेको छ ।  

गत आव २०७६/७७ असार मसान्तसम्ममा कोषले १ अर्ब ७४ करोड ३८ लाख २२ हजार रुपैयाँ साना तथा मझौला उद्यम कर्जा र २ अर्ब ३७ करोड ४७ लाख ७९ हजार रुपैयाँ कृषि कर्जा सुरक्षण गरेको थियो । 

कोषले चालू आवको माघ मसान्तमा १ खर्ब ३ अर्ब ९२ करोड ७० लाख ५८ हजार रुपैयाँ लघुवित्त तथा विपन्न वर्ग कर्जा सुरक्षण गरेको छ । 

गत आव २०७६/७७ मा कोषले ५८ अर्ब २ करोड ६२ लाख ५५ हजार रुपैयाँ लघुवित्त तथा विपन्न वर्ग कर्जा सुरक्षण गरेको थियो । 

कोषले चालू आवको माघ मसान्तसम्म १४ अर्ब ७५ करोड ९० लाख ३९ हजार रुपैयाँ सहुलियतपूर्ण कर्जा सुरक्षण गरेको छ । 

गत आवको असार मसान्तसम्ममा कोषले २ अर्ब ९६ करोड ५० लाख २२ हजार रुपैयाँ सहुलियतपूर्ण कर्जा सुरक्षण गरेको थियो । 

चालू आवको माघ मसान्तसम्ममा कोषले २४ करोड ५६ लाख २९ हजार रुपैयाँ पशुधन सुरक्षण गरेको छ । 

चालू आवको अन्तिमसम्ममा कोषले ६१ करोड ४० लाख ७२ हजार रुपैयाँ पशुधन सुरक्षण गर्ने लक्ष्य लिएको छ ।

गत आव २०७६/७७ को असार अन्तिमसम्ममा कोषले ५९ करोड ३७ लाख ८६ हजार रुपैयाँ पशुधन सुरक्षण गरेको थियो । 

भौतिक अवस्थामा पनि उस्तै सुधार

कोषले आव २०७३/७४ मा जीर्ण रहेका भौतिक संरचनाहरू चालू आवको वैशाख मसान्तसम्ममा निर्माण सम्पन्न गर्ने लक्ष्य लिएको छ ।

वैशाख मसान्तसम्ममा केन्द्रीय कार्यालयसहित सबै कार्यालयहरू आफ्नै भवनमा सर्ने कोषका सीईओ विष्णुबाबु मिश्रले बताए ।

लोकान्तरसँग उनले भने, ‘कर्मचारीहरूको साथ, सहयोग र मेहनतले कोष अगाडि बढेको छ, पूर्वाधार निर्माण भएका छन् । कोषको अवस्था निकै राम्रो भएको छ ।’

उनका अनुसार, निक्षेप सुरक्षणका लागि कोषले डीजीएमआइएस सफ्टवयर र कर्जा सुरक्षणको लागि सीजीएमआईएस तथा लेखा र प्रशासनको छुट्टै सफ्टवयर निर्माण भई कार्यान्वयन भइरहेको छ । 

यस्तै आईएस अडिटको लागि कम्पनी छनौट भइरहेको उनले बताए । 

कोषले सबै सफ्टवयर पूर्ण रूपमा ल्याई सदस्य संस्थाबाट तथ्यांक लिनेगरी काम गरिरहेको बताउँदै सीईओ मिश्रले भने, ‘यसै आर्थिक वर्षको अन्त्यसम्ममा हाम्रो कार्यालय र काम आईटीमय हुनेछ ।’

कोषले निक्षेप तथा कर्जा सुरक्षणको व्यवसाय जोखिम अध्ययन शुरूआत गरेको छ । चालू आवको अन्तिमसम्ममा यस्तो अध्ययन पूरा गरी सोहीबमोजिम कार्य गर्ने कोषको भनाइ छ । 

मिश्रले आफ्नो कार्यकालमा कोषको सम्पूर्ण अवस्थाको सुधार गरेका छन् । उनी आउनुपूर्व आव २०७३/७४ को असार मसान्तसम्म निक्षेप तथा कर्जा सुरक्षणका लागि विनियमावली कार्यान्वयनमा रहेको थियो ।

उनले आव २०७६/७७ मा निक्षेप तथा कर्जा सुरक्षणका लागि नियमावली तयार गरी मन्त्रिपरिषद्बाट स्वीकृत भएको र नयाँ ५ वर्ष रणनीतिक योजना, सुशासन, निर्देशिका, जोखिम व्यवस्थापन निर्देशिका लगायतका नीति नियमहरू संशोधन गरी कार्यान्वयनमा ल्याएका थिए । 

चालू आवमा पनि आवश्यक नीति नियम निर्माण तथा विद्यमान नीति नियम परिमार्जन गर्ने काम भइरहेको मिश्रले बताए ।