काठमाडौं, १३ जेठ– प्राय निर्माण हुने नेपाली चलचित्रको स्तरीयताको कोणबाट धेरै माथि उठ्न नसकेपनि फरक जानरामा चलचित्र बन्ने प्रवृत्तिको भने विकास भइरहेको छ । निर्माण भइरहेका नयाँ चलचित्रको ट्रेण्डमा चलचित्र पर्वलाई पनि एक उदाहरणका रुपमा लिन सकिन्छ ।

थ्रीलर जानरामा बनेको चलचित्र ‘पर्व’ कैयन कमजोरीका बीच पनि हेर्नलायक बनेको छ ।

युवा लेखक मानवविक्रम मल्ल (कोसिस क्षेत्री) नेपालको एक चर्चित साहित्यकार हुन्छ । एउटा इभेन्टको सिलसिलामा उसको भेट एक युवती ऋतु (नम्रता श्रेष्ठ) सँग हुन्छ । छोटो समयमा नै उनीहरुबीचको सम्बन्ध नजिकिँदै जान्छ । तर, मानव नजिकिनुमा ठूलै स्वार्थ हुन्छ । फिल्म त्यही स्वार्थको वरिपरि घुमिरहन्छ । किन मानव नम्रतासँग नजिकिन्छ भन्ने रहस्यका लागि भने चलचित्र नै हेर्नुपर्ने हुन्छ ।

एक लाइनमा भन्नुपर्दा चलचित्र राम्रै छ । प्रसस्तै गल्ती भएपनि कथाले पूरै चलचित्रलाई आर्कषित बनाएको छ । सस्पेन्स थ्रीलर चलचित्र मन पर्ने नेपाली दर्शकका लागि यो चलचित्र राम्रो खुराक बन्न सक्छ ।

चलचित्र सबल र दुर्वल दुवै पक्षको संगम हो । एकै घरमा पूरै चलचित्र अटाउन खोजिएको छ । तर पनि चलचित्र त्यति झुर नलाग्नुको कारण दर्शकको ध्यान तान्न सक्ने तत्व चलचित्रमा छन् ।

चलचित्रको सबैभन्दा आकर्षक पक्ष ‘पाश्र्व ध्वनि’ हो । पाश्र्व ध्वनिले चलचित्रलाई अल्छी बनाएको छैन । कथा, संवाद र निर्देशकीय पक्ष औसत लाग्छ ।

कुनै पनि कलाकारको अभिनय त्यति धेरै दमदार लाग्दैन । न त पात्रले नाटकीय अभिनय गरेका छन् । अभिनय सामान्य लाग्छ । बरु अरु कलाकारका तुलनामा कोसिसले गरेको अभिनय आकर्षक लाग्छ । केही दृश्यमा कोसिस र नम्रताको अभिनय सुहाएजस्तो लागेपनि कतै खल्लो लाग्छ । निर्देशकले पात्रलाई अझ प्रभावकारी अभिनय गराउन सकेको भए चलचित्र सुनमा सुगन्ध हुन सक्थ्यो ।

प्राय एउटै घरको आन्तरिक दृश्य र क्लब तथा पार्टी हलहरु दोहोरिने कथामा सस्पेन्स भेटिन्छ । दर्शकले फिल्मको मध्यान्तरसम्म पात्रको चरित्र विकास मात्र देख्न पाउँछन् । पहिलो भागमा कथा डगमाएको छ । केही दृश्यलाई जबरजस्ती लम्बाइएको छ । कोसिसले स्क्रीप्टलाई अझै खँदिलो बनाउनुपर्ने थियो ।

सिनेमाटोगा्रफी अर्थात छायांकन पक्ष अति सामान्य लाग्छ । आकर्षक छैन । कतिपय शट चाहिनेभन्दा संकुचित छन् । यदि चलचित्रको छायांकन पक्षलाई सुन्दर बनाउन सकेको भए फिल्म अझै परिस्कृत हुने थियो । भलै चलचित्रमा प्रकाशको संयोजन भने सुन्दर लाग्छ । परिवेशअनुकुल लाइटिङ इफेक्ट दिने प्रयास गरिएको छ ।

चलचित्रको गीत संगीत पक्ष राम्रो छ । यसका केही गीत फिल्म रिलिजपूर्व नै चर्चामा पनि थिए ।

समग्रमा चलचित्र पर्व नेपाली सिनेमा जगतका लागि फरक स्वादको चलचित्र भने हो । मसालेदार फिल्मका दर्शकका लागि यो चलचित्र मन नपर्न सक्छ । त्यति धेरै आशा नबोकेर फिल्म हल छिर्नुभयो भने ‘पर्व’ ले तपाईलाई एकछिन मनोरञ्जन दिनेछ । हलबाट निस्कने बेलामा पात्रले तपाईलाई ह्याङ्ग बनाउनेछन् ।

तर, विदेशी चलचित्र हेरिरहने दर्शकका लागि भने चलचित्रमा धेरै थोक पुगेको छैन भन्ने लाग्नेछ । ‘पर्व’ सानो कथामाथि बनेको सामान्य सिनेमा हो । सानै कथा भएपनि चलचित्रले वर्तमान समाजका विकृतिमाथि भने भारी चित्रण गरेको छ ।

---

---