परिवर्तित सन्दर्भमा अब पार्टीको ध्यान मूलतः तीनवटा विषयमा केन्द्रित हुनुपर्ने एमाले अध्यक्ष तथा प्रधानमन्त्री केपी शर्मा ओलीले बताएका छन् । पार्टीको सुदृढीकरण तथा शुद्धीकरण, समृद्धिको अभियान र नयाँ निर्वाचनको तयारीलाई पार्टीको आगामी कार्यभारतको रुपमा उल्लेख गर्दै ओलीले सोही अनुसार पार्टीलाई अघि बढाउनु पर्नेमा जोड दिएका छन् ।

विगत केही समय यता पार्टी निकै अस्तव्यस्त अवस्थामा रहेकाले अब पार्टीलाई वैचारिक रुपमा स्पष्ट, सङ्गठनात्मक रुपमा चुस्त र अनुशासित, कमरेडली भावनाले एकतावद्ध, गतिका हिसाबले बेगवान, जनताको भावनाको प्रतिनिधित्व गर्न सक्षम र नयाँ अभिभारा पूरा गर्न सक्ने गरी सुदृढ बनाउनुपर्ने ओलीले सोमबारको महाधिवेशन आयोजक समितिको बैठकमा पेश गरेको प्रतिवेदनमा उल्लेख गरेका छन् ।