कैलालीका २२ वर्षीय युवक भूपेन्द्र बडुवाल हत्या प्रकरणमा जोडिएका कैलालीका सेनानी (मेजर) अशोकजंग शाहीलाई सैनिक अदालतले सेवाबाट बर्खास्त गरेको छ । 

‘उहाँलाई केही दिनअघि सैनिक अदालतले बर्खास्त गरेको हो,’ सैनिक प्रवक्ता नारायण सिलवालले लोकान्तरसँग भने, ‘उहाँलाई कैलालीको विषयमा बर्खास्त गरिएको हो ।’
 
के थियो प्रकरण ?

बडुवाल हत्या घटनाभन्दा २ दिनअघि कात्तिक २१ गते राति करीब १० बजे मेजर शाही मदिराले मात्तिएर लम्कीचुहा नगरपालिका–३ चिसापानीस्थित संगम होटलमा पछाडिपट्टिबाट पसेका थिए ।

जान खोजेकोभन्दा अर्कै होटलमा बन्द भइसकेको अवस्थामा उनी भित्र प्रवेश गरेका थिए ।

लम्कीचुहा नगरपालिका–३ गोराङ्गेस्थित सुदूरपश्चिम पृतना तालिम शिक्षालयका सेनानी (मेजर) शाहीले आफ्नो पदीय रवाफमा स्थानीय तथा होटल सञ्चालकमाथि मुख छाडेपछि उनी चढेको गाडी र ईलाका प्रहरी कार्यालयमा तोडफोड भयो । 

आक्रोशित स्थानीयले १६ टाँका लगाउनुपर्ने गरी शाहीको टाउकोमा ढुंगा बसाए । मेजर शाहीको आचरण विपरीतको हर्कत र बदलामा शाहीमाथि ज्यानै जाने गरी कुटपिट, प्रहरी कार्यालयमा तोडफोड सहितको घटनामा प्रहरी चुपचाप बस्यो ।

पदीय रवाफ प्रदर्शन गर्ने शाहीमाथि न कुनै मुद्दा चलाइयो, न प्रहरी कार्यालय र गाडी तोडफोड गर्नेमाथि मुद्दा चलाइयो । 

फिल्मी शैलीमा राजनीतिक दल, जनप्रतिनिधि र प्रहरी सबै मिलापत्र गराउन र दोषीलाई जोगाउनमै केन्द्रित भए । आफ्नो कार्यालय नै तोडफोड हुँदा पनि प्रहरीले त्यो घटना मिलापत्रमा टुंग्याउन भूमिका खेल्यो ।

ईलाका प्रहरी कार्यालय लम्कीमा कात्तिक २२ गते भएको छलफलपछि मेजर शाहीले आफू अर्कै होटल लुक्स पस्न खोजेको तर अर्कै होटल पसेको भन्दै घटनाप्रति क्षमा मागेका थिए । 

तोडफोड भएको गाडी मेजर शाहीले आफैं बनाउने र ईलाका प्रहरी कार्यालय भवनमाथि भएको तोडफोडको जिम्मा तोडफोड गर्ने समूहले लिने सहमति बन्यो । आपसमै मर्मत गर्ने सहमतिपछि घटना नै टुंग्याइयो । कसैले कसैमाथि मुद्दा नचाउने सहमति गरे । त्यसताका कसैविरुद्ध उजुरी नपरेको भन्दै जिल्ला प्रहरी कार्यालय कैलालीले घटनालाई नजरअन्दाज गर्‍यो ।

तर बडुवाल हत्या प्रकरणले प्रहरीको अनुसन्धानलाई झन्झन् जटिल र गिजोल्न थालेपछि प्रहरी अधिकारीहरू पुर्पुरोमा हात लगाउनुपर्ने अवस्थामा छन् । 

मेजर शाही कुटपिट तथा प्रहरी कार्यालय तोडफोड घटनामा प्रत्यक्ष संलग्न रहेका त्यही संगम होटलका सञ्चालक नवीन रावल र आफन्त धीरज शाहीलगायत हत्या घटनामा मुछिएपछि प्रहरी नै छक्क परेको छ । रावल हालसम्म फरार छन् ।

लम्की र टीकापुर क्षेत्रमा बडुवाल हत्या हुनुभन्दा पहिले नै मेजर शाही घटनामा मुछिएका रावल र अर्को गरी २ समूहबीच ग्याङ फाइट हुने सूचना प्रहरीलाई थियो तर ती सबै सूचना र घटनाक्रमलाई प्रहरीले नजरअन्दाज गर्दा विवाद बढ्यो ।

बडुवाल हत्याकाण्डको भित्री पाटो– सेनाका मेजर शाही 'काण्ड’ मिलापत्रमा टुंग्याउँदाको परिणाम !