भौतिक पूर्वाधार तथा यातायातमन्त्री रेणु यादवलाई पदमुक्त गर्न नागरिक अगुवाले अपील गरेका छन् । 

डा. केदारनरसिंह केसी,  चरण प्रसाई, गणेशकुमार मण्डल,  सुशील प्याकुरेल, तारानाथ दाहाल, इन्द्र अर्याल, महामुनीश्वर आचार्य र  कनकमणि दीक्षितले संयुक्त रुपमा यस्तो अपिल गरेका हुन् । 

हत्याकाण्डमा सामेल भएको स्वीकार गर्ने र व्यक्ति हत्याको धम्की दिने मन्त्री यादवलाई तत्काल पदमुक्त गर्न उनीहरूले माग गरेका छन् । 

मन्त्री यादवले रौतहटको गौरमा आयोजित राजनीतिक कार्यक्रमलाई सम्बोधन गर्ने क्रममा व्यक्ति हत्या र सामाजिक हिंसा फैलाउने अभिव्यक्ति  दिएकोप्रति उनीहरूले गम्भीर आपत्ति पनि व्यक्त गरेका छन् । 

‘गौर हत्या काण्ड २०६३ चैत ३ गते तत्कालीन मधेसी जनअधिकार फोरमको अग्रसरतामा घटाइएको सामूहिक हत्या थियो, जसमा २८ जना माओवादी समर्थक व्यक्तिहरूले अनाहकमा जीवन गुमाउनुपरेको थियो,’ नागरिक अगुवाहरुले भनेका छन्, ‘बर्बर र पाशविक यस हत्याकाण्डका अभियुक्तलाई न्यायको कठघरामा अझैसम्म उभ्याउन नसकिएको र समाजमा दण्डहीनता कायमै रहेको अवस्थामा मन्त्री रेणु यादवको अभिव्यक्तिले उक्त हत्याकाण्डमा निजको दलकोसमेत सहभागिता भएको स्वीकारोक्ति सार्वजनिक भएको छ ।’

मन्त्री पदको गरिमालाई नसुहाउने, आपराधिक मनोवृत्ति प्रष्ट पार्ने, पुरानो अपराध समेत सार्वजनिक रूपमा स्वीकार गर्ने रेणु यादव जनताप्रति उत्तरदायी कुनै पनि पदमा रहन अयोग्य भएको स्वत: स्पष्ट हुने उनीहरूको भनाइ छ ।