राष्ट्रिय सभा सदस्यका लागि भएको निर्वाचनमा प्रदेश १ मा हालसम्म ७० प्रतिशत मत खसेको छ । निर्वाचन अधिकृत भरत लम्सालले साढे ११ बजेसम्ममा ७० प्रतिशत मत खसिसकेको जानकारी दिएका हुन् ।  

बिहान ९ बजेदेखि शुरू मतदानमा तीन पदका लागि ५ पार्टीका ८ उम्मेदवार चुनावी मैदानमा छन् ।

एमाले तथा राप्रपाका तीन उम्मेदवार एक्ला–एक्लै चुनावी मैदानमा छन् । 

गठबन्धनको तर्फबाट नेपाली कांग्रेसका गोपाल बस्नेत, नेकपा एकीकृत समाजवादीकी जयन्ती राई र जनता समाजवादी पार्टीका हेमराज थुलुङ राई उम्मेदवार छन् ।

स्थानीय तहका प्रमुख, उपप्रमुख र प्रदेश सभाका सदस्य मतदाता हुने राष्ट्रिय सभा निर्वाचनमा प्रदेश १ मा ३६४ मतदाता छन् ।

निर्वाचनमा प्रदेश सभाका ९३ जना मतदाता हुनेमा टंक आङ्बुहाङलाई माओवादी केन्द्रले कारवाही गरेपछि उनको पद रिक्त छ । १३७ स्थानीय तहतर्फ २७४ मतदाता हुनेमा दुई जनाको निधन भएको कारण २७२ जना मतदाता छन् ।

सोलुखुम्बुको खुम्बु पासाङ मुल्याहा गाउँपालिकाका अध्यक्ष ङिम दोजी शेर्पा र भोजपुरको हतुवा गढी गाउँपालिका उपाध्यक्ष चन्द्रमा राईको निधन भएपछि स्थानीय तहको दुई पद खाली छ । 

राष्ट्रिय सभा निर्वाचनमा प्रदेश सभा सदस्यको मतभार ४८ र स्थानीय तहका जनप्रतिनिधिको मत भार १८ हुने कानूनी प्रावधान छ । जसअनुसार ९२ प्रदेश सभा सदस्यहरूको मत भार ४ हजार ४१६ र २७२ स्थानीय तहका जनप्रतिनिधिको मत भार ४ हजार ८९६ गरी जम्मा मत भार ९ हजार ३१२ रहेको छ । 

प्रदेशमा नेकपा एमालेका जनप्रतिनिधिको चार हजार ५२४ मत भार रहेको छ भने गठबन्धनको पाँच दलीय गठबन्धनमा आबद्ध दलहरूको कुल मत भार चार हजार ६६८ छ । 

राप्रपाको मतभार १२० छ ।