लुम्बिनी प्रदेशमा राष्ट्रिय सभाका लागि भएको मतदानको मत गणना शुरू भएको छ ।

दाङको घोराही स्थित कर्मचारी मिलन केन्द्रको मतदान स्थलमा विहान ९ बजेदेखी सुरु भएको मतदान निर्धारित समय भित्रै सकिएको थियो । 

लुम्बिनी प्रदेशमा प्रदेश सांसद ८१ र स्थानिय तहका प्रमुख तथा उपप्रमुख २१५ गरी २९६ मतदाता रहेकोमा २९४ मत खसेको प्रदेश निर्वाचन अधिकारी निमराज भट्टराईले जानकारी दिए । 
उनका अनुसार, प्रदेश सांसद तर्फ ८१ जनाले मतदान गरेका छन् भने स्थानीय तहतर्फ २१५ मध्ये २१३ जनाले मतदान गरेका छन् । 

मतदानका लागी प्रदेश सांसद र स्थानीय पालिकाको छुट्टाछुट्टै मतदान केन्द्र बनाईएको थियो ।

लुम्बिनी प्रदेशमा ३ जना राष्ट्रियसभा सदस्य पदका लागि ६ जना उम्मेदवार भएका थिए । 

महिला सदस्यतर्फ सत्ता गठबन्धनमा रहेको एकिकृत समाजवादीको तर्फबाट पाल्पाकी राजेन्द्र लक्ष्मी गैरे र एमालेको तर्फबाट बाँकेका भारती उपाध्यय खनाल बिच प्रतिस्पर्धा भएको छ ।

राष्ट्रिय प्रजातन्त्र पार्टी नेपालगञ्ज नगरप्रमुख र रूपन्देही रोहीणाी गाउँपालिकाका उपप्रमुख गरी २ जनाको मत नखसेको निर्वाचन कार्यालय जनाएको छ ।

केही बेरमा अन्तिम नतिजा आउने निर्वाचन आयोगले बताएको छ ।