बागमती प्रदेश सभामा सोमवार हुने दुईवटा संसदीय समितिको निर्वाचनमा प्रमुख प्रतिपक्ष दल नेकपा एमालेको मात्र उम्मेदवारी परेको छ । सत्तारुढ गठबन्धनले निर्वाचन प्रक्रियामा आफ्नो उम्मेदवार खडा नगर्दा एमालेको मात्रै एकल उम्मेदवारी परेको हो । 

बागमती प्रदेश सभा सचिवालयले अर्थ तथा विकास समिति र शिक्षा, स्वास्थ्य तथा कृषि समिति सभापतिको निर्वाचनका लागि आइतवार मनोनयन दर्ताको तालिका तय गरेको थियो । 

एमालेले अर्थ समिति सभापतिमा काठमाडौंका नारायणबहादुर सिलवाल र शिक्षा समितिमा काठमाडौंकै केशवप्रसाद पोखरेललाई उम्मेदवार बनाएको छ । 

सिलवालको प्रस्तावकमा शशीजंग थापा र समर्थकमा आशामाया तामाङ छन् । त्यस्तै पोखरेलको प्रस्तावकमा दावा दोर्जे लामा र समर्थकमा प्रकाश श्रेष्ठ रहेका छन् ।

गठबन्धनको उम्मेदवार नहुँदा एमालेका उम्मेदवार सर्वसम्मत हुने निश्चित भएको छ । दुईवटै समिति सभापतिका लागि हुने निर्वाचनमा समितिका सदस्यहरूले मात्र निर्वाचन प्रक्रियामा भाग लिने हुँदा दुवै समितिमा एमालेको बहुमत रहेकाले पनि गठबन्धनले उम्मेदवार तय नगरेको बताइन्छ । 

२० जना सदस्य रहेको अर्थ समितिमा एमालेको १२, नेकपा माओवादी केन्द्रको ४, नेकपा (एकीकृत समाजवादी)को २, नेपाली कांग्रेसको १ र विवेकशील साझा पार्टीका १ जना सदस्य छन् । 

शिक्षा समितिमा पनि एमालेको १२, माओवादी केन्द्रको ३, नेपाली कांग्रेसको ३ र नेपाल मजदुर किसान पार्टी (नेमकिपा)को १ जना सदस्य छन् । 

वैशाखदेखि रिक्त रहेको अर्थ तथा विकास समितिका सदस्यहरू सन्तबहादुर प्रजा र दीपेन्द्र श्रेष्ठ प्रदेश सरकारको मन्त्री रहेकाले उनीहरू निर्वाचनमा सहभागी हुन पाउँदैनन् ।

अर्थ तथा विकास समितिका तत्कालीन सभापति सरेश नेपाल प्रदेश सरकारको मन्त्री बनेसँगै उक्त पद रिक्त थियो । 

शिक्षा, स्वास्थ्य तथा कृषि समितिका सभापति घनश्याम दाहाल राजेन्द्रप्रसाद पाण्डे नेतृत्वको सरकारमा मन्त्री नियुक्त भएसँगै उक्त पद पनि रिक्त हुँदै आएको थियो । 

प्रदेश सभाका सचिव कृष्णहरि खड्काका अनुसार अर्थ तथा विकास समिति सभापति पदको निर्वाचन भोलि सोमवार मध्यान्ह १२ बजेका लागि तय भएको बताए । त्यस्तै शिक्षा, स्वास्थ्य तथा कृषि समिति सभापति पदको निर्वाचन २ बजेका लागि तय गरिएको उनले जानकारी दिए ।