नेपाली कांग्रेसले सदनमा नाराबाजी गरेको छ।  कांग्रेसका सांसदहरुले सहकारी ठगीमा मुछिएका गृहमन्त्री रवि लामिछानेमाथि छानबिन गर्न संसदीय छानबिन समितिको मागसहित प्रतिनिधिसभा बैठकमा नाराबाजी गरेका हुन् । 

प्रतिनिधिसभाका सभामुख देवराज घिमिरेले सांसद गगन थापालाई बोल्न समय दिएपनि आफूहरूको माग पूरा हुने अवस्था नरहेको भन्दै कांग्रेसका सांसदले नाराबाजी गर्दै विरोध गरेका हुन् । 

कांग्रेसका सांसदहरुले ‘सहकारी पीडितलाई न्याय दे, संसदीय छानबिन समिति गठन गर, सहकारी ठगलाई कारबाही गर’लगायतका नारा लगाउँदै नाराबाजी गरे । 

विरोधका बिच सभामुखले सदनको कारबाही अघि बढाउन खोजेपनि कांग्रेस सांसदहरू बेल घेराउमा समेत पुगे । कांग्रेसका सांसदहरुले अवरोध जारी राखेपछि सभामुखले बैठक १५ मिनेट स्थगित गरेका छन् ।