सिन्धुलीको गोलन्जोर गाउँपालिका–७, खुर्कोटमा लागूऔषधसहित एक युट्युबर पक्राउ परेका छन् । 

बर्दिवासबाट काभ्रेपलाञ्चोकको धुलिखेलतर्फ जाँदै गरेका काठमाडौं महानगरपालिका-२६, सामाखुसीका २६ वर्षीय चेतन कार्कीलाई शुक्रवार प्रहरीले पक्राउ गरेको हो ।

कार्कीले चलाएको चेतनब्लग आवरणको ०१-००३क ९१८२ नम्बरको मिनी ट्रक जाँच गर्दा लागूऔषध फेला परेको थियो । 

कार्कीले लगाएको ट्रयाकसुटको दाहिने खल्तीबाट खैरो हेरोइन ४ दशमलव १३० ग्राम बरामद भएको प्रहरी प्रवक्ता एवं डीएसपी मनोजकुमार लामाले जानकारी दिए ।

जाँचका क्रममा गाडीभित्र राखेको गितारको कभरमा लुकाएर राखेको ६ दशमलव ९३० ग्राम गाँजासमेत प्रहरीले फेला पारेको छ । 

युट्युबर कार्कीलाई लागूऔषध मुद्दामा शुक्रवार सिन्धुली अदालतबाट ७ दिनको म्याद थपी अनुसन्धान थालिएको डिएसपी लामाले बताए ।