स्थानीय निर्वाचन- यस्तो छ आन्तरिक कार्यतालिका, वैशाख ११ मा मनोनयन दर्ता

आगामी वैशाख ३० गते हुने स्थानीय तहको निर्वाचनका लागि वैशाख ११ गते उम्मेदवार मनोनयन गर्ने गरी निर्वाचन आयोगले आन्तरिक कार्यतालिका तयार गरेको छ । 

वैशाख ११ गते बिहान १० बजेदेखि अपरान्ह ४ बजेसम्म उम्मेदवारको मनोनयन दर्ता गर्ने समयसहितको कार्यतालिका तयार पारेर आयोगले परामर्श थालेको हो । 

निर्वाचन आयोगको स्रोतले लोकान्तरलाई दिएको जानकारीअनुसार वैशाख ११ गते नै अपरान्ह ४ देखि ६ बजेसम्ममा मनोनयन पत्र दर्ता भएका उम्मेदवारको सूची प्रकाशन गर्ने तयारी छ । यसअघि वैशाख २ मा गर्ने प्रस्ताव गरिएको  थियो । 

यस्तै वैशाख १२ गते १० देखि ५ बजेसम्म उम्मेदवारको विरोधमा उजुरी दिने, वैशाख १३ देखि १४ गते अपरान्ह ५ बजे सम्ममा मनोनयन पत्र र उजुरी उपर जाँचबुझ गरी निर्णय गर्ने समय निर्धारण गरिएको छ । 

वैशाख १४ गते अपरान्ह ५ देखि ६ बजे सम्म मनोनयन भएका उम्मेदवारको नामावली प्रकाशन गर्ने तालिका बनाइएको छ । वैशाख १५ गते १० देखि ४ बजेसम्म उम्मेदवारको नाम फिर्ता लिने समय निर्धारण गरिएको छ । 

वैशाख १६ गते १० देखि मध्यान्ह १२ बजे सम्म उम्मेदवारको अन्तिम नामावली प्रकाशन गर्ने, सोही दिन १२ देखि ३ बजे सम्म उम्मेदवारलाई निर्वाचन चिह्न प्रदान  गर्ने तालिका बनाइएको छ । 

त्यसै गरी निर्वाचन प्रयोजनका लागि राजनीतिक दल दर्ताका लागि २०७८ फागुन १ गते देखि १० गते सम्मका लागि समय निर्धारण गरिएको छ । त्यही अवधिसम्म राजनीतिक दलको तर्फबाट औपचारिक पत्र प्रदान गर्ने पदाधिकारीको दस्तखत नमूना प्राप्ति गर्ने समय पनि निर्धारण गरिएको छ । 

२०७८ फागुन १६ गते राजनीतिक दल दर्ता स्वीकृतिका लागि छुट्याइएको छ । १७ गते स्वीकृत दलको नामावली नेपाल राजपत्रमा प्रकाशनका लागि पठाउने तालिका बनाइएको छ । 

फागुन १८ गते निर्वाचन कार्यक्रम स्वीकृति र नेपाल राजपत्रमा प्रकाशनका लागि पठाउने, फागुन २० गते बजेट प्राप्ति गर्ने समयसहितको तालिकामाथि निर्वाचन आयोगले परामर्श थालेको छ ।

आयोगले तोकेको मितिदेखि जेठ ६ गते सम्म निर्वाचन आचारसंहिता कार्यान्वयन गरिने समय निर्धारण गरिएको छ । 

२०७९ वैशाख २ गते निर्वाचन अधिकृतको नियुक्ति गरिने, वैशाख ३ गते कालोसूचीमा रहेका व्यक्तिहरूको विवरण निर्वाचन अधिकृतलाई हस्तान्तरण गर्ने तालिका बनाइएको छ ।

वैशाख ३ गते नै राजनीतिक दलको आधिकारिक दस्तखत नमूनासहितको पत्र सबै निर्वाचन अधिकृतलाई हस्तान्तरण गर्ने समय निर्धारण गरिएको छ । 

वैशाख २७ देखि वैशाख २९ सम्म मौन अवधि निर्धारण गरिएको छ । वैशाख २८ देखि २९ सम्म मतदान केन्द्रमा मतदाता परिचयपत्र वितरण गर्ने तालिका बनाइएको छ । 

निर्वाचन आयोगका प्रवक्ता शालिग्राम शर्मा पौडेलका अनुसार आयोगले बनाएको तालिकामाथि छलफल चलिरहेको तथा एक/दुई दिनमै आयोगले उक्त निर्वाचन कार्यतालिका स्वीकृत गरेर सार्वजनिक गर्ने तयारी गरिएको छ ।