धनुषाको जनकपुर उपमहानगरपालिका-६ महाराज सागर पोखरी छेउबाट अन्दाजी ७ महिनाको बालकको अपहरणमा संलग्न भनिएका तीन पक्राउ परेका छन् । 

पक्राउ पर्नेहरूमा गणेशमान चारनाथ नगरपालिका-१० डुमरीया बस्ने ३५ वर्षीया मनिषादेवी मुखिया, औरही गाउँपालिका-१ पौडेश्वर घर भई हाल जनकपुर उपमहानगरपालिका-८ डेरा गरी बस्ने २० वर्षीया किरण राम र जनकपुर उपमहानगरपालिका-७ भ्रमपुरा डेरा गरी बस्ने महोत्तरी लोहारपट्टी नगरपालिका-४ घर भएका २२ वर्षीय कृष्णकुमार यादव रहेका छन् । 

उनीहरूलाई प्रहरीले बिहीवार पक्राउ गरेको हो । 

पोखरी छेउमा ६ वर्षीया दिदीले खेलाई रहेको अवस्थामा ती बालकलाई अन्दाजी ३५ वर्षीया महिलाले लिएर भागेको भन्ने खबर प्राप्त भएपछि अनुसन्धानमा जिल्ला प्रहरी कार्यालय धनुषा र वडा प्रहरी कार्यालय रेल्वेबाट प्रहरी टोली खटिएको थियो । 

प्रहरीले जनकपुर उपमहानगरपालिका-१९ बेंगा शिवपुर पिपराढीस्थित हाँस तथा भैसी फारमको पछाडि खेतमा मनिषा देवी मुखियालाई भाग्दै गरेको अवस्थामा ती बालकसमेत २ वटा बच्चासहित फेला पारी पक्राउ गरेको जनाएको छ । 

प्रारम्भिक अनुसन्धानको क्रममा मनिषा देवीले बालककी दिदीलाई ५० रूपैयाँ दिई कुरकुरे किन्न पठाई बच्चा लिई भागेको खुल्न आएको हो । 

यस सम्बन्धमा थप अनुसन्धान भइरहेको जिल्ला प्रहरी कार्यालय धनुषाले जनाएको छ ।