त्रिपुरेश्वर चोकमा आधुनिक र सुविधासम्पन्न सार्वजनिक शौचालय निर्माण गरिएको छ । काठमाडौं महानगरपालिकाले एरोसानसँगको सहकार्यमा शौचालयको निर्माण गरेको हो । 

काठमाडौं महानगरपालिकाका प्रमुख विद्यासुन्दर शाक्यले बढी भीडभाड हुने स्थान, पार्कलगायतका ठाउँमा आधुनिक शौचालय निर्माणलाई प्राथमिकतामा राखेको जानकारी दिए । 

प्रमुख शाक्यले भने, ‘हेर्दा सफा देखिने शौचालयमा महिनावारी भएका महिलाका लागि स्यानिटरी प्याड प्रयोग गर्न र त्यसको व्यवस्थापन गर्न मिल्ने डिस्पोजल मेशिनको समेत यहाँ व्यवस्था गरिएको छ ।’

महानगरपालिकाले निर्माण गर्ने हरेक शौचालय दृष्टिविहीन, शारीरिक रुपमा फरक क्षमता भएका नागरिकका लागि समेत सहज हुने गरी निर्माण गर्ने योजना रहेको उनले बताए । 

उनले अब निर्माण हुने शौचालय स्यानिटरी प्याड, पर्याप्त पानी, बत्तीको समेत व्यवस्थासहितका हुने जानकारी पनि दिए । 

‘काठमाडौं महानगरपालिकाले जति पनि सार्वजनिक पार्क निर्माण गरेको छ, ती सबै ठाउँमा अनिवार्य शौचालय निर्माण गरेको छ,’ शाक्यले भने,  ‘हरियालीको आनन्द लिँदै पार्क घुम्न आउने हरेक नागरिकले शौचालयका लागि घर फर्किनु पर्ने वा नजिकका घरमा छिर्नुपर्ने बाध्यता नहोस् भनेर हामीले निर्माण गरेका हरेक पार्कमा पनि सेवाका लागि शौचालयको अनिवार्य व्यवस्था गरेका हौँ ।’

उनले वातावरणीय र जनवास्थ्यको पक्षलाई समेत ध्यानमा राखेर महानगरपालिकाले ३२ वटै वडामा यस्ता शौचालय निर्माण गर्दै जाने नीति लिएको जानकारी दिए । 

प्रमुख शाक्यले काठमाडौं महानगरपालिकाले सबै वडामा सुविधाजनक सार्वजनिक शौचालय निर्माण गर्ने योजनाअनुसार नै यसअघि चक्रपथ सडक खण्डको स्वयम्भू बुद्धपार्क क्षेत्रमा स्वचालित नमूना सार्वजनिक शौचालयको सञ्चालनमा ल्याएको जानकारी दिए । 

‘सर्वसाधारणलाई सहज शौचको व्यवस्था होस् भन्ने हेतूले काठमाडौं महानगरपालिकाले आर्थिक वर्ष २०७८/७९ को नीति, कार्यक्रम तथा बजेटमा होटल, रेष्टुरेन्ट पसल जस्ता व्यवसायहरूले आफ्नो प्रयोजनका लागि बनाएका शौचालयमा सर्वसाधारणका लागि निःशुल्क सेवा उपलब्ध गराएमा व्यवसाय करमा ५० प्रतिशत छुट दिने घोषणा गरेको छ,’ शाक्यले भने, ’काठमाडौं महानगरपालिकाले बढी भीडभाड हुने स्थानमा समेत यस्तो शौचालयलाई प्राथमिकतामा राखेको छ ।’ उनले केही महिनाअघि नयाँ बानेश्वर छक्कुपक्कु पार्कमा पनि आधुनिक शौचालय निर्माण भएको र हाल सञ्चालमा रहेको बताए । 

उपप्रमुख हरिप्रभा खड्गी श्रेष्ठले यस्ता शौचालय ३२ वटै वडामा निर्माण गर्ने योजना रहेको बताइन् ।