नेकपा एमालेका अध्यक्ष केपी शर्मा ओलीले गठबन्धनलाई तह लगाइछाड्ने उद्घोष गरेका छन् । 

सूर्यविनायक नगर अस्पतालको उद्घाटन समारोहलाई सम्बोधन गर्दै ओलीले पानीमुनि गए पनि गठबन्धनलाई नछाड्ने बताएका हुन् । 

‘जस्तै पानीमुनि गए पनि कहाँ बच्ला यो गठबन्धन । पानीमुनिबाट निकालेर भए पनि यसलाई ठेगान लगाइन्छ,’ ओलीले भने । 

अबको एक वर्षमा संसदीय चुनाव आउने र त्यसपछि गठबन्धनको भविष्य बाँकी नरहने उनले बताए । ‘स्वार्थी गठबन्धन कहाँ बच्छ र ? अब त बढीमा एक वर्ष हो यिनका आयु । संसारभरका ज्योतिषीलाई एक ठाउँमा राखेर सोध्यो भने पनि त्यही भन्छन्,’ ओलीले भने ।

गठबन्धनभित्रको झगडालाई संकेत गर्दै उनले भने, ‘पाँच जना कोठामा भेला भएर ङ्यारङ्यार ङुरङुर गरिरहेका छन् । बैठकबाट एउटा जुरुक्क हुन्छ र बालकोट जाउँ ? भन्छ । अर्कोले जाने भयो जाउ न त भन्छ । अर्कोले च्याप्प समाउँछ र बसाल्छ ।’

ओलीले आफ्नाविरुद्ध अख्तियार दुरुपयोग अनुसन्धान आयोगमा उजुरी परेको भन्दै रोष प्रकट गरे । 

उनले भने, ‘कुख्यात भ्रष्टाचारीको सरकार छ, तिनका मान्छेहरू मेराविरुद्ध उजुरी लिएर अख्तियार पुगेका छन् । जसले घर सम्पत्ति दान गरेर बसेको छ उसका विरुद्ध भ्रष्टाचारको उजुरी गरिएको छ ।’