चालू आर्थिक वर्षको ७ महिनामा ११ खर्ब ४७ अर्ब रूपैयाँको वस्तु तथा सेवा आयात भएको छ । 

भन्सार विभागले मंगलवार सार्वजनिक गरेको साउनदेखि माघसम्मको तथ्यांकअनुसार आयात ४२.७८ प्रतिशतले बढेको हो । यस्तो आयात गत वर्षको सोही अवधिमा ८ खर्ब ३ अर्ब रूपैयाँको मात्रै थियो ।

यो अवधिसम्मको नेपालको व्यापार घाटा ३८ प्रतिशतले बढेको छ । निर्यातको तुलनामा आयातको हिस्सा अधिक भएकोले पनि व्यापार घाटा हरेक महिना बढिरहेको छ । 

माघसम्मको नेपालको व्यापार घाटा १० खर्ब १५ अर्ब रूपैयाँ पुगेको छ । यस्तो व्यापार घाटा अघिल्लो वर्षको सोही अवधिमा ७ खर्ब ३३ अर्ब रुपैयाँको मात्रै थियो । 

यो अवधिसम्ममा नेपालको वैदेशिक व्यापार भने १२ खर्ब ७९ अर्ब रूपैयाँको रहेको छ । नेपालमा साढे ११ खर्बको आयात हुँदा निर्यात भने एक खर्ब ३१ रूपैयाँको मात्रै छ । 

यस्तो निर्यात चालू आर्थिक वर्षको ७ महिनामा ८८.३० प्रतिशतले बढेको छ । गत वर्षको माघसम्ममा भएको यस्तो निर्यात ६९ अर्ब ९१ करोड रूपैयाँको मात्रै रहेको थियो । 

नेपालमा हुने वैदेशिक व्यापारमा कुल आयातको हिस्सा नै ८९ प्रतिशत गरेको छ । यसमा निर्यातको हिस्सा भने जम्मा १०.२९ प्रतिशत रहेको पनि भन्सार विभागको तथ्यांकमा उल्लेख छ । 

नेपालमा चालू आर्थिक वर्षको ७ महिनामा सबैभन्दा बढी आयात भएको वस्तु पेट्रोलियम पदार्थ हो । यो अवधिसम्मको पेट्रोलियम पदार्थको आयात नै एक खर्ब ८५ अर्ब रूपैयाँको छ ।