संसद् बैठक स्थगित भएपछि प्रधानमन्त्री शेरबहादुर देउवासहित कांग्रेसका नेता र प्रमुख प्रतिपक्ष दलका नेताहरू संसद् भवनभित्र संवादमा छन् । 

संसद् भवनभित्र एमाले संसदीय दलका नेता केपी ओलीको कार्यकक्षमा नेताहरू संवादमा जुटेका हुन् । 

प्रधानमन्त्री शेरबहादुर देउवा, एमाले अध्यक्ष केपी शर्मा ओली, एमाले वरिष्ठ उपाध्यक्ष ईश्वर पोखरेल, उपाध्यक्ष सुवास नेम्वाङ, कांग्रेसका महामन्त्री गगन थापा र सञ्चारमन्त्री ज्ञानेन्द्र कार्की छलफलमा सहभागी छन् । 

छलफल शुरू हुँदा एमाले अध्यक्ष ओली उनको कार्यकक्षमा रहेको आफ्नै कुर्सीमा बसेर प्रधानमन्त्रीलगायत नेताहरूसँग संवाद गरेका थिए ।

संवाद लम्बिँदै गर्दा ओली प्रधानमन्त्री शेरबहादुर देउवा बसेको सोफामा सरेका थिए । देउवा र ओली एउटै सफामा बसेर छलफल गरिरहेका छन् ।

प्रधानमन्त्री देउवाले सभामुख अग्निप्रसाद सापकोटालाई प्रमुख प्रतिपक्ष दलसँग सहमतिको लागि संवाद गर्नुपर्ने भएको भन्दै आजको संसद् बैठक स्थगित गरिदिन आग्रह गरेका थिए । 

संसद् बैठकमा भाग लिन बानेश्वरस्थित संसद् भवनमा पुगेका नेताहरू द्वीपक्षीय छलफलमा जुटेका छन् ।