नेकपा एमालेका अध्यक्ष केपी शर्मा ओलीसँग भेटवार्ता गर्न प्रधानमन्त्री शेरबहादुर देउवा शनिवार बालकोट जान लागेका छन् । 

अपरान्ह ५ बजे प्रधानमन्त्री देउवा र एमाले अध्यक्ष ओलीको भेट हुन लागेको ओलीको सचिवालयले बताएको छ ।

संसदमा पेश भएको एमसीसी अनुमोदनका लागि एमालेको सहयोग लिने प्रधानमन्त्री देउवाको प्रयास छ । 

त्यसका लागि एमालेलाई मनाउन देउवा निरन्तर संवादमा छन् । शुक्रवार साँझ पनि कांग्रेस र एमालेका नेताहरूबीच लामो संवाद भएको थियो । 

शुक्रवारको संवादबाट ठोस निष्कर्षमा पुग्न नसकेका नेताहरू आज फेरि भेट्ने सहमतिसहित छुट्टिएका थिए ।

एमसीसीमा सहयोगका लागि सभामुखको राजीनामा गराउनुपर्ने नभए एमालेले १४ जना सांसदलाई कारवाही गरेर संसद सचिवालयमा पठाएको पत्र सभामुखले टाँस्नुपर्ने माग गरेको छ । 

कांग्रेस भने एमालेको मागमा सहमत भइसकेको छैन । आज हुने नेताहरूको भेटमा एमसीसी अनुमोदनबारे कांग्रेस र एमालेका नेताहरूबीच निर्णायक वार्ता हुने बताइएको छ ।

सत्ता गठबन्धनमा रहेका नेकपा माओवादी केन्द्र र एकीकृत समाजवादी पार्टीले एमसीसी अनुमोदन गराउन सघाउने प्रस्ताव गरेको भए पनि प्रधानमन्त्री देउवा आश्वस्त हुन नसकेको उनी निकट नेताहरू बताउँछन् । 

देउवाले एमसीसीको पक्षमा मतदान सुनिश्चितता गर्न प्रचण्ड र माधव नेपाललाई भनेका छन् । तर, उनीहरूले भने एमसीसी निर्णयार्थ प्रस्तुत हुने संसद बैठक बहिस्कार गरेर सहयोग गर्ने बताएका थिए । 

तर, देउवालाई भने प्रचण्ड र माधव नेपालको प्रस्तावमा भर नलागेको उनी निकट स्रोतले बताएको छ ।