बेलारुसले संविधान संशोधन गरेर खुलायो आणविक हतियार राख्ने बाटो

बेलारुसका मतदाताहरूले देशमा आणविक हतियार राख्ने अनुमतिका लागि संविधान संशोधनलाई स्वीकृत गरेका छन् । 

यससँगै अब रुसले बेलारुसमा आणविक हतियार राखेर युक्रेनमाथि आक्रमण गर्न पाउने भएको छ । 

बेलारुसको निर्वाचन आयोगले जनमतसंग्रहमा लगभग ६५.२ प्रतिशत जनताले संविधान संशोधनका विषयमा मत दिएको जनाएको छ । 

कुल ७८.६३ प्रतिशत मतदाता जनमतसंग्रहमा सहभागी बनेका थिए । 

राष्ट्रपति अलेक्जेन्डर लुकाशेन्कोको कठोर शासनमा यस्तो परिणाम आउनु आश्चर्यको कुरा हैन ।

कुनै बेलामा सोभियत संघअन्तर्गतको मुलुक बेलारुसले त्यसको विघटनपछि आणविक हतियार परित्याग गरेको थियो । तर अहिले युक्रेनमाथि रुसले सैन्य आक्रमण गरेपछि लुकाशेन्कोले रुसका राष्ट्रपति भ्लादिमिर पुटिनलाई पूर्ण साथ दिइरहेका छन् र त्यसैक्रममा आणविक हतियार राख्ने प्रपञ्च मिलाएका हुन् । 

आइतवार मतदान केन्द्रमा बोल्दै लुकाशेन्कोले बेलारुसको आणविक हतियार फर्काउन रुसलाई आग्रह गर्ने बताए । 

‘पश्चिमले आणविक हतियार हाम्रो सीमानजिक पोल्यान्ड वा लिथुएनियामा राख्ने हो भने म पनि पुटिनलाई आणविक हतियार निःशर्त फर्काउन भन्छु,’ लुकाशेन्कोले बताए ।