नेकपा (एकीकृत समाजवादी)का सम्मानित नेता तथा पूर्व प्रधानमन्त्री झलनाथ खनालले एमसीसीको व्याख्यात्मक घोषणा भनेको ‘न्यानो थाङ्नो’ मात्रै भएको बताएका छन् । 

बुधवार विराटनगर विमानस्थलमा सञ्चारकर्मीहरूसँग कुरा गर्दै नेता खनालले व्याख्यात्मक टिप्पणी भनेको नेपालका नेताहरूलाई आनन्दपूर्वक सुतुन् भनेर बनाइएको एउटा न्यानो थाङ्नो मात्रै भएकोे बताएका हुन् । 

२७५ सांसदलाई हेरेको हेर्‍यै पारेर जबरजस्ती पास गरेको उनले आरोप लगाए । ‘यो नेपालको इतिहासमा दुःखद लज्जाजनक कुरा हो,’ उनले भने ‘न छलफल गर्ने वातावरण बन्यो, सांसदहरूलाई हेरेको हेर्‍यै पारेर जबरजस्ती माथिबाट पेलेर पास गरियो । त्यहाँभित्र अनेकौँ राष्ट्रघाती कुरा भए पनि अहिले एउटा सिकाको सुतारीसमेत सुधारिएको छैन ।’

एमसीसी संसदबाट पास गर्दासमेत प्रक्रिया नपुगेको उनको भनाइ छ । ‘सदनमा प्रस्तुत भएको प्रस्ताव सदनभर नै छलफल गर्नुपर्ने हुन्छ,’ उनले भने, ‘छलफल भएन भने अर्को सदनमा फेरि पेश गर्नुपर्ने हुन्छ ।’ 

‘केपी ओलीले टेबुल गरेका थिए भनेर कथा सुनाएजस्तै’ गरेर पास गरेको उनको भनाइ छ । उनले व्याख्यात्मक टिप्पणीलाई कथित भनेका छन् । 

‘कथित घोषणा टिप्पणी अलग्गै पारित गरेर, एमसीसी सम्झौता अलग्गै पारित गर्नुपर्ने भए पनि हामीलाई थाहै निदई झ्यामझ्याम आएर झ्यामझ्याम पास गरियो,’ उनले भने । 

एमसीसीले ल्याउने परिणाम अब जन्माउँदै जाने उनको भनाइ छ । कार्यान्वनमा ठूलो चुनौती समेत रहेको उनी बताउँछन् । ‘एमसीसीले नेपालको भाग्य भविष्यमाथि दूरगामी असर गर्छ,’ उनले भने, ‘यसले संसद विभाजित बनायो, राजनीतिक पार्टी विभाजित भए, यस्ता थुप्रै असरहरू देखिन बाँकी छ ।’

यस्तै उनले गठबन्धन एमसीसीका कारण नबनेको र एमसीसीकै कारण नटुट्नेसमेत बताए ।