ऊर्जा, जलस्रोत तथा सिँचाइमन्त्री पम्फा भुसालले महिलाहरू ५० प्रतिशत अधिकार प्राप्तिका लागि आन्दोलित हुनुपर्ने बताएकी छन् । 

मंगलवार ११२ औँ अन्तर्राष्ट्रिय महिला दिवसको अवसरमा आयोजित कार्यक्रमलाई सम्बोधन गर्दै मन्त्री भुसालले महिलाले पाएको ३३ प्रतिशत अधिकारलाई लागू गर्दै बाँकी रहेको १७ प्रतिशत अधिकार प्राप्तिका लागि आन्दोलित हुनुपर्ने बताएकी हुन् । 

उनले महिलाहरूले राजनीतिक, संवैधानिक र कानूनी रुपमा अधिकार पाए पनि व्यावहारिक रुपमा अधिकारको प्रत्याभूति हुन नसकेको बताइन् । 

छोरीहरूलाई छोरा सरह पैतृक सम्पत्तिमा अधिकार दिने कुरा संविधान र कानूनमा उल्लेख गरिएको भए पनि व्यवहारमा कार्यान्वयन हुन नसकेको उनले बताइन् । 

‘३३ प्रतिशत महिला भनेपछि को हो त १७ प्रतिशत त्यो अधिकार पाउन नपर्ने महिला ? या त सक्षम भएर भनौँ अब चाहिन्न भनेर या त ती १७ प्रतिशत महिला पनि अवसर र अधिकारबाट वञ्चित हुनु हुन्न,’ उनले भनिन्, ‘त्यसैले ३३ को लागू गरेर १७ को अधिकारको प्राप्ति अबको आन्दोलनको एजेण्डा हुनुपर्दछ । राजनीतिक, संवैधानिक र कानूनी हिसाबले मात्रै पाएर हुँदैन । जीवन र व्यवहारमा लागू गर्ने कुरा त्यत्तिकै हुन्छ ।’ 

मन्त्री भुसालले अझै पनि महिलामाथि हुने हत्या, हिंसा र बलात्कारका घटनाहरू घट्नु चुनौतीको विषय भएको बताइन् ।