मोरङको सुन्दरहरैँचा-७ मा डेढ वर्षीया बालिकाको बलात्कारपछि हत्या गरेको आरोपमा पक्राउ परेका दाजुभाइलाई प्रहरीले सार्वजनिक गरेको छ । 

अपहरण शैलीमा घरबाट बालिकालाई झाडीमा लगेर बलात्कारपछि हत्या गरेको आरोपमा सोही ठाउँका २८ वर्षीय मिथुन र २५ वर्षीय अजय चौधरीलाई प्रहरीले पक्राउ गरेको हो । 

घरमा खेल्दै गरेकी बालिकालाई १० रूपैयाँ दिएर फकाएर लगेर बलात्कारपछि हत्या गरेको मोरङ प्रहरी प्रमुख एसपी जनार्दन जिसीले जानकारी दिए । 

प्रहरीका अनुसार अजयले ती बालिकालाई घरदेखि करीब १०० मिटर पर खोला किनारको झाडीमा लगेका थिए । अजय मिथुनका भाइ हुन् । अजयले करणी गर्दा बालिका धेरै चिच्याएपछि बियरको बोतल र ढुंगाले टाउकोमा हानेको जिसीको भनाइ छ । 

बलात्कारपछि बालिकालाई त्यहीँ छाडेर एक भट्टी पसलमा गएर रक्सी खाएको प्रहरीको भनाइ छ । ​अजयका दुईवटी श्रीमती छन् भने मिथुन अविवाहित हुन् । 

‘दाजुभाइले पालैपालो बलात्कार गरेछन्,’ एसपी जिसीले भने, ‘पहिला भाइ अजय र पछि दाजु मिथुनले बलात्कार गरेको अनुसन्धानबाट खुलेको छ ।’

बलात्कार गर्नुअघि उनीहरूले केराबगानमा गाँजा खाएर योजना बनाएको प्रहरी अनुसन्धानबाट खुलेको छ । ‘खोलामा बालुवा चालिरहेका मिथुन र भाइ अजयबीच भेट भएछ,’ उनले भने, ‘केराबगानमा गाँजा खाँदै योजना बनाएछन्, त्यसपछि अजयले बालिकालाई ल्याएका रहेछन् ।’

मृतक बालिका र पक्राउ पर्ने दाजुभाइको घर करीब ३०० मिटरको फरकमा छ । उनीहरूलाई घरबाटै नियन्त्रणमा लिएको प्रहरीको भनाइ छ । 

घटनाको प्रमाण नष्ट गर्न मिथुनले ढुंगा केही पर फालेका थिए । 

बालिका शुक्रवार साँझ ५ बजे तिर घरबाट हराएकी थिइन् । परिवारले खोज्दा ६ः३० बजेतिर नजिकैको झाडीमा बालिका चिच्याइरहेको अवस्थामा फेला पारेका थिए । उनको शुक्रवार मध्यरातमा विराटनगरको नोबेल अस्पतालमा उपचारका क्रममा मृत्यु भएको हो । 

पक्राउ परेका दाजुभाइलाई प्रहरीले म्याद थप गरी अनुसन्धान अघि बढाएको छ ।

आरोपी अजय गत मंसिरमा जेलबाट छुटेका व्यक्ति हुन् । दुई वर्षअघि दुई वर्षीया बालिकालाई बलात्कार गर्न अपहरण गरेर ल्याउँदै गर्दा स्थानीयले थाहा पाएपछि नियन्त्रणमा लिएर बुझाएका थिए । पीडित बालिकाका आफन्तले बयान फेरेपछि उनलाई अदालतले रिहाइ गरेको थियो ।