प्रधानमन्त्री एवं नेपाली कांग्रेसका सभापति शेरबहादुर देउवाले मन्त्री रहेको समयमा एमसीसी पास गर्ने एमाले नेता भीम रावलले अहिले विरोध गरिरहेको भन्दै आपत्ति जनाएका छन् ।

एमाले अध्यक्ष केपी शर्मा ओलीले संसदमा दर्ता गरेको एमसीसी आफ्नो सरकारले पास गरेको देउवाले बताए । 

नुवाकोटको किस्पाङ गाउँपालिकाको भवनको सोमवार उद्घाटन गर्ने कार्यक्रममा देउवाले एमसीसीको विरोध गरिरहेका रावलप्रति आक्रोश व्यक्त गरेका हुन् । 

‘भीम रावलजी सबभन्दा बढी एमसीसीको खिलाफमा हुनुहुन्छ, त्यसबेला उहाँ रक्षामन्त्री हुनुहुन्थ्यो । मन्त्री हुँदा आफैंले पास गर्ने, त्यसबेला किन राजीनामा गर्नुभएन ? भीम रावलले के हेरेर बसे त्यसबेला ? यस्ता दुई जिब्रे कुरा गर्न पाइन्छ ?,’ आक्रोशित हुँदै देउवाले भने, ‘आफू रक्षामन्त्री हुँदा संसदमा ल्याउने, मैले ओलीजीले ल्याएको प्रस्ताव ल्याउँदा भीम रावललाई किन टाउको दुख्ने ? । केपी ओलीको सरकारमा मन्त्री थिए उनी, त्यसबेला किन एमसीसीको विरोध गरेर राजीनामा गर्नुभएन ? अहिले आएर बोल्ने लाज छैन ?’