नेपाली नेता र काठमाडौंस्थित अमेरिकी दूतावासलाई बमले उडाउँछु भन्ने कृष्णबहादुर थापालाई अदालतले पुर्पक्षका लागि थुनामा पठाएको छ । 

जिल्ला अदालत काठमाडौंले चैत १ गते पुर्पक्षको लागि उनलाई कारागार पठाएको साइबर ब्युरोले जानकारी दिएको छ । 

जीतपुरसिमरा उपमहानगरपालिका–१६ का २५ वर्षीय थापालाई साइबर ब्युरोले फागुन १२ पक्राउ गरेको थियो । 

उनले एमसीसी पास भए आफूले नेपाली नेता र अमेरिकी राजदूतावास तथा पास गर्ने सबैलाई बमले उडाउने भन्दै ट्वीटरमा पोष्ट गरेका थिए । उनले भारतबाट बम ल्याएको समेत लेखेका थिए । 

अमेरिकाको यूएस डिपार्टमेन्ट अफ जस्टिस, फेडेरल ब्युरो अफ इन्भेस्टिकेसनले ब्युरोलाई दिएको उजुरीको आधारमा प्रहरीले फागुन १२ गते मकवानपुर हेटौंडा उपमहानगरपालिका–६, हात्तीलेटबाट उनलाई पक्राउ गरेको थियो । 

थुनामा गएका थापाले त्यो समयमा सामाजिक अभियन्ताहरूले एमसीसीको चर्को विरोध गरेकाले त्यसको लहलहैमा लागेर स्टाटस लेखेको प्रहरीलाई बयान दिएका छन् । 

‘त्यो बेलामा माहोल नै एमसीसीको विरोधमा थियो । त्यही झोँकमा स्टाटस लेखेको हुँ,’ भन्ने बयान दिएको ब्यूरोका अनुसन्धान अधिकृतले लोकान्तरलाई बताए ।