छुट्टाछुट्टै दुर्घटनामा ३ जनाको मृत्यु

कञ्चनपुर, सिरहा र सिन्धुलीमा भएको छुट्टाछुट्टै दुर्घटनामा तीन जनाको मृत्यु भएको छ । 

कञ्चनपुर, भीमदत्त नगरपालिका-६ शान्ती निकेतनस्थित सडकमा ना.४ ख ४४६६ नम्बरको बसको ठक्करबाट एक साइकलयात्रीको मृत्यु भएको छ । 

प्रहरीका अनुसार सोही नगरपालिका-७ बस्ने ४० वर्षीया मन्जु देवी बुडालको सोमवार बिहान घटनास्थलमै मृत्यु भएको हो । हाल फरार बसका चालकको प्रहरीले खोजी गरिरहेको छ । 

सिरहा, लहान नगरपालिका-११ पडरियास्थित सडकमा स.१ त ४५५६ नम्बरको ट्याक्टरको ठक्करबाट पैदलयात्री करिब ४२ वर्षीय पुरुषको सोमवार बिहान मृत्यु भएको छ ।

ठक्करबाट गम्भीर घाइते भएका उनको उपचारको लागि लहानतर्फ लैजाने क्रममा बाटोमै मृत्यु भएको हो । हाल फरार ट्याक्टर चालकको प्रहरीले खोजी गरिरहेको छ । 

सिन्धुली, कमलामाई नगरपालिका-११ फाल्चुरीस्थित सडकमा प्र २-०२-००१ ह १७२० नम्बरको अटो आफैं अनियन्त्रित भई सोमवार बिहान दुर्घटना हुँदा अटोमा सवार कमलामाई नगरपालिका-७ माझिटार बस्ने ४५ वर्षीय अमित लामाको मृत्यु भएको छ । 

दुर्घटनामा गम्भीर घाइते भएका लामाको उपचारको लागि जिल्ला अस्पताल सिन्धुलीतर्फ लैजाने क्रममा बाटोमै मृत्यु भएको हो । साथै दुर्घटनामा घाइते भएका अटोमा सवार १ जनाको जिल्ला अस्पताल सिन्धुलीमा उपचार भइरहेको छ । अटो चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले थप अनुसन्धान गरिरहेको जनाएको छ ।