प्रदेश १ को मन्त्रिपरिषद्को मंगलवार बसेको बैठकले प्रदेश खेलकुद विकास बोर्डमा पदाधिकारी नियुक्त गरेको छ । 

बैठकले बोर्डको उपाध्यक्ष जीना कार्की र सदस्य सचिव हंसराज वाग्लेलाई नियुक्त गर्ने निर्णय गरेको प्रदेश १ सरकारका प्रवक्ता एवं यातायात व्यवस्था तथा सञ्चारमन्त्री उपेन्द्रप्रसाद घिमिरेले जानकारी दिए । 

सोमवार बसेको मन्त्रिपरिषद् बैठकले प्रदेश खेलकुद बोर्ड उपाध्यक्ष बाबा मेयाङ्बो र सदस्यसचिव कृष्ण (पर्शुराम) बस्नेतलाई पदमुक्त गरेको हो ।

मेयाङ्बो र बस्नेतलाई तत्कालीन मुख्यमन्त्री भीम आचार्यले गत असोज २४ गते नियुक्त गरेका थिए । 

सामाजिक विकासमन्त्री राजन राईले माघ अन्तिममा मेयाङ्बो र बस्नेतलाई तीनदिने स्पष्टीकरण सोधेका थिए ।

उनीहरूले दिएको स्पष्टीकरण चित्तबुझ्दो नभएको भन्दै उनीहरूलाई मन्त्रिपरिषद्को बैठकले पदमुक्त गर्ने निर्णय गरेको हो । 

बस्नेतको सदस्यसचिव बन्ने योग्यता नपुग्ने भन्दै सरकारले स्पष्टीकरण सोधेको थियो । 

प्रदेश खेलकुद बोर्डको सदस्य सचिव बन्न कम्तीमा १० वर्ष खेलकुद क्षेत्रमा योगदान दिएको र असल चालचलन भएको हुनुपर्ने कानूनी प्रावधान छ ।

प्रदेश १ सरकारले प्रदेश योजना आयोगको उपाध्यक्षमा डा. पूर्ण लक्समलाई नियुक्त गरेको छ । 

शेरधन राईको पालामा नियुक्त सुबोध प्याकुरेल मुख्यमन्त्री राईसँगै पदमुक्त भएपछि सो पद खाली भएको थियो । उनी यसअघि आयोगको सदस्य थिए । 

आयोगका सदस्यहरूमा डा. ज्ञानेन्द्रबहादुर कार्की, नारायण कोइराला, प्रकाश राई र अन्जु खड्कालाई नियुक्त गरिएको छ । 

सरकारले प्रदेश प्रशिक्षण केन्द्रको कार्यकारी निर्देशक पदमा विष्णुकुमार कार्कीलाई नियुक्त गरेको छ । उनी अवकाश प्राप्त सरकारी कर्मचारी हुन् । 

सरकारले यातायात व्यवस्था तथा सञ्चार मन्त्री उपेन्द्र घिमिरेलाई सरकारको प्रवक्ता तोकेको छ ।