सर्वोच्च अदालतका कायम मुकायम प्रधानन्यायाधीश दीपककुमार कार्कीले मुख्य रजिष्ट्रार लालबहादुर कुँवरलाई ३ दिनभित्र खटाएको स्थानमा हाजिर हुन निर्देशन दिएका छन् ।

लिखित पत्र नै दिएर कामु प्रधानन्यायाधीश कार्कीले कुँवरलाई पाटन उच्च अदालतको न्यायाधीशको नियुक्ति लिन भनेका हुन् ।

पाँच दिनअघि नै कुँवरको नाममा पत्र दिइएको सर्वोच्च प्रशासनले जानकारी दियो । तर, अहिलेसम्म कुँवर खटाएको स्थानमा गएका छैनन् ।

‘सम्माननीय कामु प्रधानन्यायाधीशले पाँच दिनअघि नै पत्र दिनुभएको हो, उहाँ (मुख्य रजिस्ट्रार कुँवर)ले कुनै निर्णय गर्नुभएको थाहा छैन,’ सर्वोच्चका एक अधिकारीले लोकान्तरसँग भने । 

न्याय परिषद्को बैठकले मुख्य रजिस्ट्रार कुँवरलाई पाटन उच्च अदालतको न्यायाधीश नियुक्त गरेको थियो ।

पढ्नुहोस्, यो पनि :

कामु प्रन्या कार्कीलाई पहिलो गाँसमै ढुंगा, साता बित्दा पनि आफ्नै निर्णय कार्यान्वयनमा असफल !

फागुन अन्तिम साता नियुक्त गरिए पनि कुँवरले मुख्य न्यायाधीशभन्दा तल्लो तहमा नजाने अडान राखेका थिए । 

न्याय प्रशासनमा मुख्यसचिवसरहको मानिने मुख्य रजिस्ट्रारलाई यसअघि उच्च अदालतको मुख्य न्यायाधीश बनाइएको थियो ।