मुद्दाको चाप बढेको भन्दै महानगरीय प्रहरी परिसर काठमाडौंमा दुई जना एसपी राख्ने निर्णय गरिएको छ । 

पछिल्लो समय काठमाडौं जिल्लामा मुद्दाको चाप बढेको विषयलाई मध्यनजर गर्दै दुई जना प्रहरी उपरीक्षक (एसपी) खटाइएको प्रहरी प्रधान कार्यालयका प्रवक्ता एसएसपी विष्णुकुमार केसीले जानकारी दिए । 

‘मुद्दाको चापलाई हेरेर खटाउने गरिएको छ, त्यसैले काठमाडौंमा २ जना एसपी राखिएको हो,’ केसीले लोकान्तरसँग भने ।

सम्मुखमा रहेको स्थानीय तहको निर्वाचन र मुद्दाको चापलाई मध्यनजर गरेर एसपी सानुराम भट्टराईलाई काजमा खटाइएको प्रवक्ता केसीले बताए । एसपी दिनेशकुमार मैनाली यसअघिदेखि नै परिसरमा कार्यरत छन् ।

अब परिसर काठमाडौंका मुद्दाका एसपीले काठमाडौं जिल्लामा रहेका १४ वटा वृत्तका मुद्दाहरूको अनुगमनसमेत गर्नेछन् ।

परिसर काठमाडौंमा एक जना एसपीको मात्रै दरबन्दी छ । अब थप एक एसपी थपेर दुई जना पुर्‍याइएको छ । तर, पछिल्लो एसपीको दरबन्दी थप नभई काजमा मात्रै खटाएको प्रहरी प्रधान कार्यालयले जनाएको छ । 

मुद्दाको चाप भएका जिल्ला प्रहरी कार्यालय झापा, मोरङ, रुपन्देहीलगायतका जिल्लाहरूमा पनि २ जना ट्वाइसी अर्थात मुद्दा हेर्ने छुट्टै प्रहरी नायव उपरीक्षक (डीएसपी)हरू खटाएको एसएसपी केसीले लोकान्तरलाई बताए । 

अन्य जिल्लाहरूमा १ जना ट्वाइसी र मुद्दा हेर्ने प्रहरी निरीक्षक (इन्स्पेक्टर) छन् । 

यस्तै काठमाडौं उपत्यका अपराध अनुसन्धान कार्यालय अर्थात महानगरीय अपराध अनुसन्धान महाशाखामा पनि दुई जना एसपीको दरबन्दी छ ।

उपत्यकामा परिसर ललितपुरमा मुद्दा हर्ने एक जना डीएसपी, परिसर भक्तपुरमा मुद्दा हेर्ने इन्स्पेक्टर र काठमाडौं उपत्यका ट्राफिक प्रहरी कार्यालयमा एक जना एसपीको दरबन्दी छ ।