कांग्रेससँग सभामुखको आग्रह– प्रधानमन्त्रीले विश्वासको मत लिने बैठक अवरुद्ध नगरिदिनुस्

सभामुख देवराज घिमिरेले प्रधानमन्त्रीले विश्वासको मत लिने बैठक सहज ढंगले संचालन गर्न प्रमुख प्रतिपक्षी दल नेपाली कांग्रेससँग आग्रह गरेका छन् । सहकारी ठगीमा संसदीय छानबिन गठनबारे गृहकार्य चइरहेकोले सोमवारको प्रतिनिधि सभा बैठक चल्न दिन घिमिरेले कांग्रेससँग आग्रह गरेका हुन् ।

सोमवार बसेको कार्यव्यवस्था परामर्श समिति बैठकमा सभामुखले प्रधानमन्त्रीले बहुमत परीक्षण गर्छुभन्दा त्यसको व्यवस्थापन गर्नु आफ्नो दायित्व भएको बताएका हुन् । प्रचण्डले सोमवार प्रतिनिधि सभामा विश्वासको मत लिने कार्यसूची छ । 

नेपाली कांग्रेसले भने संसदीय छानबिन समिति नबन्दासम्म बैठक चल्न नदिने अडान लिएको छ । ‘संसदीय अभ्यासमा केही यस्ता बिजनेस पनि हुन्छन्, जहाँ सत्तापक्ष र प्रतिपक्ष एक ठाउँमा आउनुपर्दछ । जस्तो कि केही दिनअघिमात्रै हामीले नीति तथा कार्यक्रम प्रस्तुत गर्दा सौहार्दता प्रस्तुत गरेका छौं । प्रधानमन्त्रीको विश्वासको मतको विषय पनि यस्तै हो । एक सातापछि नै बजेट ल्याउँदैछौं’ घिमिरेले भने, ‘मुलुकको कार्यकारी प्रमुखले आफ्नो बहुमत परीक्षण गर्छु भनेर सम्मानित संसद्‌मा प्रस्ताव गरेको अवस्थामा यसलाई प्रभावित बनाउनु हुँदैन । संसद्‌को नेतृत्वको हिसाबले मैले यसको व्यवस्थापन गर्नै पर्दछ । यसलाई गम्भीरतापूर्वक लिन म प्रमुख प्रतिपक्षी र प्रतिपक्षी दलहरूको ध्यानाकर्षण गराउँदछु ।’

गृहमन्त्री रवि लामिछानेले आइतवार संसद्‌मा गरेको सम्बोधनपछि आक्रोशित भएको कांग्रेसले संसदीय छानबिन समिति गठनपछि मात्र विश्वासको मतको कार्यसूची अगाडि बढ्ने अडान लिएको छ ।