नेकपा एमालेले मोरङका तीन पालिका प्रमुखका लागि सर्वसम्मत रुपमा एक–एक जनाको नाम सिफारिस गरेको छ । 

वैशाख ३० गते हुने स्थानीय निर्वाचनका लागि दुई गाउँपालिका र एक नगरपालिकामा एमालेले सर्वसम्मत नाम सिफारिस गरेको हो । 

रंगेली नगरपालिकामा माओवादीबाट केही दिनअघि एमाले प्रवेश गरेका मेयर दिलीप अग्रवाललाई नै एमालेले मेयरको उम्मेदवार बनाउने भएको छ । 

अग्रवाल एमालेमा प्रवेश भएसँगै माओवादी प्रदेश १ मा मेयरविहीन भएको थियो । उनी कांग्रेस, माओवादी हुँदै एमालेमा प्रवेश गरेका हुन् ।  

यस्तै उपमेयरमा ३ जनाको नाम सिफारिस गरिएको छ । बहालवाला उपमेयर केशवकुमारी खराल, उषा झा र भूमा पराजुलीको नाम सिफारिस भएको एमाले रंगेली नगर कमिटीले जनाएको छ । 

मेयर अग्रवाल र उपमेयर खराल दुवै अघिल्लो चुनावमा माओवादीबाट विजयी भएका हुन् । उनीहरूलाई केही दिन अघि मात्रै एमाले अध्यक्ष केपी शर्मा ओलीले पार्टी प्रवेश गराएका थिए । 

यस्तै कटहर गाउँपालिकाको प्रमुखमा मुसहरु मण्डलको नाम मात्रै सिफारिस भएको छ । उपाध्यक्षमा भने ५ जनाको नाम एमाले कटहरी गाउँ कमिटीले जिल्ला कमिटीलाई सिफारिस गरेको छ । 

किरणदेवी चौधरी, उपासी देवी राजवशी, सीता पाठक, विमला विष्ट, राधा देवी पासवानको नाम सिफारिस गरिएको एमाले कटहरी गाउँ कमिटीले जनाएको छ । 

जहदाँ गाउँपालिकामा भने अध्यक्ष उपाध्यक्षमा एक–एक जनाको नाम सिफारिस गरिएको छ । अध्यक्षमा कृष्ण गिरी र उपाध्यक्षमा अनिता सोरेनको नाम सिफारिस गरिएको हो । 

उपाध्यक्षमा सिफारिस भएकी सोरेन अघिल्लो चुनावमा कांग्रेसबाट उपाध्यक्षकी उम्मेदवार बनेकी थिइन् । जहदाँमा अध्यक्ष–उपाध्यक्षमा संघीय समाजवादी फोरमले जितेको थियो । 

मोरङका अधिकांश वडामा वडाध्यक्ष सदस्य पदमा भने सर्वसम्मत भएको नेकपा एमाले मोरङका सचिव रुपेश खतिवडाले बताए ।

विराटनगरले भने यसअघिकै प्रमुख–उपप्रमुखको नाम सिफारिस गरिसकेको छ ।