नेकपा माओवादी केन्द्रले वैशाख ५ गतेभित्र केन्द्रीय कार्यालयमा स्थानीय तह निर्वाचनमा सम्भावित उम्मेदवारको नाम सिफारिस गर्न पार्टीको तल्लो तहमा परिपत्र गरेको छ ।

माओवादी केन्द्रले सोमवार पार्टीको तल्लो तहमा उम्मेदवार चयनसम्बन्धी निर्देशनात्मक परिपत्र गरेको हो ।  

माओवादी केन्द्रका अध्यक्ष पुष्पकमल दाहाल प्रचण्डले हस्ताक्षर गरेर पठाएको परिपत्रमा स्थानीय तह निर्वाचनको लागि महानगर, उपमहानगरको प्रमुख उपप्रमुखको उम्मेदवारको नाम सर्वसम्मत भएमा एक जना र नभए प्राथमिकताक्रममा ३ जनासम्मको नाम केन्द्रीय कार्यालयमा पेश गर्न भनिएको छ । 

त्यसै गरी नगरपालिका र गाउँपालिका प्रमुख र उपप्रमुख, अध्यक्ष र उपाध्यक्षको सिफारिस सम्बन्धित पालिका समितिले गर्ने र जिल्ला समन्वय समितिको सुझावसहित प्रदेश समितिले उम्मेदवार टुंगो लगाउन माओवादी केन्द्रले परिपत्र गरेको छ । 

स्थानीय तहको वडाध्यक्ष र सदस्यहरूको उम्मेदवार भने वडा समितिको सिफारिसमा पालिका समितिले टुंगो लगाउन भनिएको छ ।

प्रचण्डले पठाएको परिपत्रमा पाँच राजनीतिक दलको गठबन्धनसँग तालमेलका लागि प्राथमिकताका साथ जोड दिन निर्देशन गरिएको छ । 

‘केही स्थान तालमेल हुन नसक्ने अवस्था आएमा र गठबन्धनकै दलहरुबीच स्वस्थ प्रतिस्पर्धा गर्नुपर्ने अवस्था आएमा केन्द्रको स्वीकृति लिई गर्नुपर्ने,’ परिपत्रमा भनिएको छ । 

त्यसै गरी स्थानीय सरकारमा महिलाको कार्यकारी भूमिका सुनिश्चित गर्न विजयको सम्भावना भएका पालिकामध्ये प्रत्येक जिल्लामा कम्तीमा एक  पालिका प्रमुख वा अध्यक्षमा र प्रत्येक पालिकाअन्तर्गत कम्तीमा एउटा वडाध्यक्षमा महिला उम्मेदवारी दिन विशेष जोड दिन पनि परिपत्रमा भनिएको छ ।