एमालेले रूपन्देहीको तिलोत्तमा नगरपालिका प्रमुखका लागि चार जना र उपप्रमुख पदका लागि ५ जनाको नाम सिफारिस गरेको छ । 

एमाले तिलोत्तमा नगर कमिटीको बैठकले मेयरमा बहालवाला मेयर वासुदेव घिमिरे, नेताहरू मोहन चापागाई, यज्ञ गैरे र दिनेश फुल्लेलको नाम सिफारिस भएको एमाले तिलोत्तमा नगर कमिटी अध्यक्ष तामनाथ पाण्डेले लोकान्तरलाई जानकारी दिए । 

त्यस्तै उपप्रमुख उम्मेदवारका लागि बहालवाला उपमेयर जागेश्वरदेवी चौधरी, नेतृहरू देवी वाग्ले, रेनुका खरेल, जमुना लम्साल र संगिता गुरूङ सिफारिस भएका छन् । 

तिलोत्तमा एमालेका युवा नेता घनश्याम भुसाल र गृहमन्त्री बालकृष्ण खाणका गृहनगर हो । २०७४ को निर्वाचनमा एमालेले मेयरउपमेयरसहित बहुमत वडामा जित निकालेको थियो । तिलोत्तमा ८५ हजार ७४७ मतदाता छन् । एमाले आफ्नो विरासत जोगाउने मेयरको खोजीमा छ । 

गृहमन्त्री खाणलाई आफ्नो नगरमा कसरी जित निकाल्ने चिन्ता छन् । 

मेयर घिमिरेले २१ हजार ८६८ मत ल्याउँदा नेपाली कांग्रेसका रामकृष्ण खाणले १९ हजार ९४ मत ल्याएका थिए ।

१७ मध्ये ४ वडामा कांग्रेस र १३ वडामा एमालेका उम्मेदवार विजयी भएका थिए । अघिल्लो पटक गठबन्धन हुँदा पनि एमालेले जित हासिल गरेकाले आफ्नो शाख जोगाउने रणनीतिमा एमाले देखिन्छ ।