चुनावी तालमेललाई लिएर गठबन्धनमा खटपट परिरहेका बेला माओवादी केन्द्रका अध्यक्ष पुष्पकमल दाहाल प्रचण्डले जसपाका नेताहरूसँग छलफल गरेका छन् । 

माओवादी संसदीय दलको कार्यालय सिंहदरवारमा आइतवार छलफल भएको हो ।

छलफलमा जसपाका अध्यक्ष उपेन्द्र यादव र संघीय परिषद् अध्यक्ष डा. बाबुराम भट्टराई सहभागी थिए । 

वैशाख ३० गते हुने स्थानीय तह निर्वाचनमा गठबन्धनबीच चुनावी तालमेल गर्ने सहमति भएपछि नेपाली कांग्रेसका स्थानीय समिति तालमेलका लागि तयार देखिएका छैनन् । 

माओवादी र जसपाबीच तराईका जिल्लामा चुनावमा सहकार्य बढाउने सहमति भएको स्रोतको दाबी छ । यद्यपि अध्यक्ष यादवले सामान्य कुराकानी भएको प्रतिक्रिया दिए । 

नेपाली कांग्रेस र जसपाबीच पर्सामा तालमेल नगर्ने र मैत्रीपूर्ण प्रतिस्पर्धा गर्ने लिखित सहमति नै भएको छ । मधेश प्रदेशका अन्य जिल्लामा पनि तालमेलमा कांग्रेस सकारात्मक नबनेको माओवादी र जसपाको आरोप छ ।