नेपाली कांग्रेस गुल्मीको धुर्कोट गाउँपालिकाले अध्यक्षको उम्मेदवारको टुंगो लगाएको छ ।

बुधवार बसेको गाउँपालिकाको बैठकले नेपाल विद्यार्थी संघका पूर्व केन्द्रीय उपाध्यक्ष एवं महाधिवेशन प्रतिनिधि महेन्द्रप्रसाद भण्डारीलाई कांग्रेसको तर्फबाट सर्वसम्मत उम्मेदवारको रूपमा चयन गरेको पालिका सभापति हरिबहादुर थापाले बताए । 

‘महेन्द्र भण्डारीले कांग्रेसका निमित्त आफ्ना व्यक्तिगत अवसर गुमाउनुका साथै धुर्कोटको समग्र विकासमा उहाँले दिएको चासो र चिन्ताका कारण हामी सबै पदाधिकारीले सर्वसम्मत निर्णय गर्‍यौं,’ सभापति थापाले लोकान्तरसँग भने ।

भण्डारी कांग्रेसमा मात्र नभई अन्य दलसँग पनि लोकप्रिय नेताका रूपमा पहिचान बनाएका नेता भएकाले उनले जित्ने दाबी थापाले गरे ।

२०७४ सालको स्थानीय निर्वाचनमा कांग्रेस माओवादीको गठबन्धनबाट माओवादीका भुपाल पोख्रेल अध्यक्ष र कांग्रेसका शिव केसी उपाध्यक्षमा निर्वाचित भएका थिए ।